طالبانو د یو ایراني مقام د هغو څرګندونو په اړه، چې ویلي وو د ایران زعفران افغانستان ته قاچاق کېږي او بیا نړۍ ته صادرېږي، ویلي چې د افغانستان ټول صادرات د افغانستان محصولات دي.
د ایران د زعفرانو د پراختیا صندوق یو غړي محمد رضا اردیخاني د یکشنبې په ورځ ویلي وو چې د دې هېواد د زعفرانو یوه عمده برخه په قاچاقي توګه افغانستان ته صادرېږي او باید مخه یې ونیول شي.
د طالبانو د صنعت او سوداګرۍ وزارت په یوې اعلامیې کې، پرته له دې چې د کوم کس نوم واخلي، ویلي دي، چې «بې له شکه د افغانستان صادر کېدونکي زعفران داخلي تولیدات دي... افغانان ضرورت نه لري چې په بې کیفیته زعفرانو باندې په نړیوال بازار کې د افغانستان د زعفرانو» نوم بد کړي.
په بلجیم کې د ذایقي او کیفیت انستیتوت په تېرو نهو کلونو کې د افغانستان زعفران غوره ګڼلي دي.
ایراني مقام اردیخاني ادعا وکړه چې افغانستان هر کال تر ۲۰ ټنه زعفران تولیدوي خو ۹۰ ټنه زعفران بهرنیو هېوادونو ته صادروي، چې په خبره یې «افغانستان ته وارد شوي تقریبآ ۷۰ ټنه زعفران د ایران دي، چې ارزانه اخیستل کېږي او بیا د افغانستان له لوري صادرېږي».
دغه ایراني مقام د خپلې ادعا د تقویت لپاره وویل چې افغانستان ته د ایران د زعفرانو د قاچاقو یو عمده علت دا دی چې ایران ته د افغانستان د زعفرانو تعرفه ۳۷ سلنه ده، په داسې حال کې هند ته د افغانستان د زعفرانو تعرفه صفر دی.
د طالبانو د سوداګرۍ او صنعت وزارت په اعلامیې ویلي دي، چې د «بې اساسه ادعاو په ځای، د تولیداتو د کیفیت په ښه کولو سره د نړۍ په بازار کې ښه ځای» نیول کېدای شي. اعلامیې د افغانستان زعفران باکیفیته بللي دي.
د طالبانو حکومت د صنعت او سوداګرۍ وزارت ویاند اخوندزاده عبدالسلام جواد څه موده مخکې ویلي وو چې افغانستان د ۱۴۰۳ لمریز کال په لومړیو شپږو میاشتو کې د څه باندې ۲۰ میلیون ډالرو په ارزښت ۸۰ ټنه زعفران هند، اسپانیا، سعودي عربستان، امریکا، فرانسې، جرمني او بریتانیا ته صادر کړي دي.
زعفران تقریبآ ۲۰ کاله مخکې په لومړي ځل په هرات کې وکرل شول او اوس د افغانستان په ۲۸ ولایتونو کرل کېږي.
فورم \ دبحث خونه