مشهور چاپنداز سرور پهلوان چې تازه یې په مزارشریف کې د بزکشۍ ټورنمنټ ګټلی، وايي د کاله تر ۱۰ زره ډالر ترلاسه کوي او همدارنګه بریالي ټیم ته د سپانسر شرکتونو له خوا ۳۵۰۰۰ زره ډالر ورکول کیږي چې د ټیم غړي یې په خپلو کې ویشي.
په مزار شریف کې د مارچ د اتمې نیټې لوبې د یما پټرولیم ټیم وګټلې چې سرور پهلوان هم پکې لوبه کوي.
ددې ټیم مالک د یما پټرولیم رئیس سعید کریم وویل: "ددې ټیم دپاره په اسونو، چاپندازانو او لوازمو باندې موږ شاوخوا یو میلیون ډالر پانګونه کړې ده."
د تیلو دغه افغان سوداګر د خپل ټیم دپاره د سرور پهلوان په ګډون د افغانستان په سطحه دوه مشهور چاپندازان او ۴۰ اسونه تیار کړي چې د هر اس قیمت د ۱۰۰ زرو ډالرو په شاوخوا دی.
هغه وویل: "زه غواړم خپلو خلکو ته خدمت وکړم. کله چې زما ټیم لوبه ګټي دا زما دپاره د ویاړ ځای دی."
سعید کریم د خپل ټیم او اسونو ساتلو دپاره په څلور جریبه ځمکه باندې یو مرکز جوړ کړی او وايي چې د اسونو ساتلو او چاپندازانو د معاشونو لګښت یې د کال ۳۰۰ زره ډالرو ته رسیږي.
د بزکشۍ لوبه چې په تاریخي لحاظ د افغانستان په شمال کې دود ده، اوس د هېواد جنوب ته هم غځېدلې. طالبانو د ۱۹۹۶ او ۲۰۰۱ کلونو ترمنځ، په خپلې لومړنۍ واکمنۍ کې، پر دغې لوبې بندیز لګولی و خو اوس یې ورته اجازه ورکړې ده.
د افغانستان د بزکشۍ فدراسیون رئیس غلام سرور جلال وویل: "بزکشي یوه ملي لوبه ده. طالبان پوهیږي چې په دې لوبه خلک خوشحالیږي نو ځکه یې اجازه ورکړې ده."
طالبان همدارنګه له هغو ۱۳ ټیمونو څخه مالیه ټولوي چې د ۲۰۲۰ کال راهیسې د بزکشۍ د ملي لیګ په سیالیو کې ګډون کوي.
په لوبه کې د چپاندازانو او اسونو د ژوبلېدو د مخنیوي په خاطر ځینې اصلاحات هم پلې شوي او په اوسنیو لوبو کې، د نویو مقرراتو څخه سرغړوونکو چپاندازانو ته ژیړ یا سره کارتونه ورکول کیږي.
د میلیونونو ډالرو پانګونه
د بزکشۍ په لوبه کې د پانګونۍ سره، د لوبې د مقاماتو په خبره، ددې لوبې د مینه والو شمېر هم زیات شوی دی.
په مزارشریف کې د وروستیو سیالیو لیدلو ته ددغه ښار لوبغالي ته شاوخوا ۱۰ زره کسان راغلي و. خو ښځو پکې په دودیزه توګه او همدارنګه د طالبانو له خوا د لګول شویو بندیزو له کبله ګډون نه درلود.
د بزکشۍ د فدراسیون رئیس غلام سرور جلال وویل: "لوبو ته ډیر کتونکي ځکه راځي چې هغوی پوهیږي چې په لوبو کې ډیر نور ښه اسونه او ښه ټیمونه ګډون کوي."
جلال وايي، د طالبانو د بیا واکمن کېدو راهیسې بزکشۍ پرمختګ کړی او په ملي کچه د چپاندازانو شمېر چې ۱۰۰ تر۲۰۰ وو، اوس ۵۰۰ ته ځکه لوړ شوی چې د هغه په خبره، "ډیر شمیر ځوانان دې لوبې ته لیوالتیا ښيي."
هغه زیاته چې په روان کال کې ۲۰ پانګه اچوونکو ورسره اړیکه نیولې او ټاکل شوې ده چې د بزکشۍ په ټیمونو کې څلور تر پنځه میلیون ډالرو پانګونه وکړي.
جلال وویل: "موږ غواړو دا لوبه هم د فوټبال او کرکټ په څېر وده وکړي."
فورم \ دبحث خونه