په نړۍ کې په لومړي ځل جاپان داسې راکټ ازمویلی چې د تیلو پر ځای د غواګانو فاضله مواد سوځوي.
دغه ازموینه د پنجشنبې په ورځ دسمبر اوومه (لیندۍ ۱۶) د جاپان په کلیوالي سیمې تایکي کې ترسره شوه او په ترڅ کې یې ولیدل شول چې له راکټ څخه د لسو ثانیو دپاره ۱۵ متره لوړه نیلي نارنجي رنګه شعاع او د اور لمبه وځي.
د انټرسټیلر تکنالوژۍ اجرائیوي رئیس تاکایرو انګاوا په وینا، دا راکټ د تیلو پر ځای د "بایومیتان" ګاز سوځوي چې په بشپړ ډول د سیمې په دوو فارمونو کې د غواګانو له فاضله موادو څخه جوړ شوی دی.
انګاوا فرانس پرس ته وویل: "موږ دا کار یوازې د دې لپاره نه کوو چې دا د چاپیریال لپاره ښه دی، بلکې ځکه چې دا داخلي تولید دی، خورا ارزانه دی، او داسې د سونګ مواد دي چې هم قوي او هم پاک دي."
هغه وویل: "فکر نه کوم چې دا به مبالغه وي، چې کیدای شي دا کار په ټوله نړۍ کې عام شي. موږ لومړنی خصوصي شرکت یو چې دا کار کوو."
د انټرسټیلر شرکت تمه لري د غواګانو د فاضله موادو د انرژۍ په کارولو سره په فضا کې سپوږمکۍ ځای په ځای کړي. دغه شرکت ددې کار دپاره د صنعتي ګازو د تولیدونکي شرکت "ایر واټر" سره همکاري پیل کړې ده.
د ایر واټر شرکت له ځایی بزګرانو سره کار کوي چې په خپلو فارمونو کې داسې وسایل ځای پرځای کړي چې د غواګانو فاضله مواد په بایوګاز تبدیل کړي. وروسته ایر واټر شرکت له فارمونو څخه دا بایوګاز راټولوي او د فضايي راکټونو په انرژۍ یې بدلوي.
د ایر واټر انجنیر تومو هیرو نیشیکاوا وویل، جاپان د انرژۍ محدودې داخلي سرچینې لري او اړ دی ترڅو داسې په کور دننه د انرژۍ تولید ته توجه زیاته کړي چې لږ زهرجن ګازونه تولیدوي.
هغه زیاته کړه: "د دې سیمې د غواګانو فاضله مواد خورا ډیر ظرفیت لري. که په نړیوالو چارو کې څه بدلون راشي، دا مهمه ده چې جاپان له وړاندې د انرژۍ داخلي سرچینې موندلي وي."
د جاپان فضايي ماموریتونه
د جاپان فضايي ادارې (JAXA) د سپتمبر په میاشت کې خپل "مون سپنر" ماموریت پیل کړ، مګر دا سکتور په وروستیو کلونو کې د دوو ناکامو ماموریتونو سره له ستونزو سره مخ دی.
د جولای په میاشت کې د جاپان په تیلو چلېدونکی د اپسیلون فضايي راکټ هوا ته له توغېدلو ۵۰ ثانیې وروسته وچاودېد.
د غواګانو له فاضله موادو ترلاسه کیدونکی بایوګاز لا وړاندې د نړۍ په نورو برخو کې د سونګ د توکو په توګه کارول کیږي. د هند په اینډور ښار کې ښاري بسونه د همدې ګازو په مټ چلیږي.
د غواګانو او نورو څارویو فاضله مواد د نړۍ د ۱۴ سلنه زهرجنو ګازونو د تولید لامل ګڼل کیږي. کارپوهان وايي، له خوشایو څخه د انرژۍ د تولید صنعت به د چاپیریال په پاک ساتلو کې هم مرسته وکړي.
فورم \ دبحث خونه