د امریکا د متحدو ایالتونو د ملي امنیت سلاکار، جیک سولیوان د جمعې په ورځ جون دوهمه (غبرګولي ۱۱مه) وویل، امریکا چمتو دی چې د خپلو اټومي کوپړیو محدودیتونه وساتي، په دې شرط چې روسیه ورته کار ترسره کړي.
نوموړي همداشان ویلي، هېواد یې چمتو دی چې له روسیې او چین سره د اټومي وسلو د کمولو پر نوي تړون خبرې وکړي.
ښاغلي سولیوان د اټومي وسلو د کمولو د سټراتیژیک تړون په چوکاټ کې د اټومي کوپړیو محدودیت ته په اشارې سره وویل، امریکا چمتو ده چې تر هغه د اټومي کوپړیو محدودیت وساتي چې روسیه ورته عمل ته ژمنه وي.
د روسیې ولسمشر ولادیمیر پوتین د فبرورۍ په ۲۱ مه د "نوي پیل" - - New Start په تړون کې د مسکو ګډون وځنډاوه چې د نړۍ د دوو سترو اټومي قدرتونو، متحدو ایالتونو او روسیې ترمنځ د اټومي وسلو د کمولو وروستی تړون دی.
د امریکا د متحدو ایالتونو د ملي امنیت سلاکار همداشان له روسیې څخه وغوښتل چې د نوي سټارټ د تړون د بدیل لپاره چې په ۲۰۲۶ کال کې یې موده پای ته رسیږي، خبرو اترو ته حاضر شي.
د سټراتیژیکو نویو وسلو د کمولو یا "نوي پیل" تړون د متحدو ایالتونو او روسیې ترمنځ د اټومي وسلو د کمولو لوی تړون دی.
د سټراتیژیکو نویو وسلو د کمولو تړون د نړۍ د دوو سترو اټومي ځواکونو ترمنځ د خپل ډول وروستی دوه اړخیز تړون دی چې په نړۍ کې تر ټولو زیاتې اټومي وسلې لري.
دا تړون په ۲۰۱۰ کال کې د امریکا او روسیې تر منځ لاسلیک شو چې له مخې یې هر یو هېواد باید د خپلو اټومي وسلوزیرمې ۱۵۵۰کوپړیو ته راکمې کړي.
د تړون له مخې امریکا او روسیه اړ دي چې د خپلو اټومي وسلو د توغولو د دستګاو او د خپلو سترو بم غورځونکو الوتکو شمیر ۸۰۰ ته راټیټ کړي، هغه شمیره چې لاهم کولای شي د ځمکې کره څو ځله ویجاړه کړي.
د روسیې ولسمشر ولادیمیر پوتین د ۲۰۲۱ کال په جنورۍ کې موافقه وکړه چې دغه تړون د نورو پنځو کلونو لپاره یعني تر ۲۰۲۶ کال پورې وغځیږي.
د دې تړون د شرایطو پر بنسټ، مسکو او واشنګټن یو بل ته اجازه ورکوي چې په کال کې څه کم ۲۰ ځلې د یو بل اټومي اډې معاینه کړي.
د دې راپور یوه برخه د فرانس پرس اژانس څخه اخیستل شوې.
