نړیوال بانک له کرونا ویروس سره د مبارزې او روغتیايي خدمتونو ته د خلکو د چټک او مساوي لاسرسي برخه کې له افغانستان سره د ۱۱۳ میلیون ډالرو مرسته کوي.
نړیوال بانک پخپل راپور کې ویلي چې په دغو مرستو کې ۶۰ میلیون یې د کرونا ویروس واکسین د پېر او تطبیق لپاره ځانګړي شوي دي.
د نړیوال بانک د تېرې ورځې مارچ ۱۸(کب ۲۸) په اعلامیه کې راغلي: "دغه بلاعوضه مالي مرسته چې مجموعي ارزښت یې ۱۱۳ میلیونو ډالرو ته رسېږي، له کووید-۱۹ سره د چټکې مقابلې او د افغانستان د روغتیایي سېسټم د چمتووالي پروژې له لوري به مصرف شي."
د نړیوال بانک د معلوماتو له مخې د دې مالي مرستې په واسطه به د افغانستان تر ۱۷ فیصده زیات خلک د کووېډ-۱۹ واکسین ترلاسه کړي او هم به د اړینو روغتیایي خدماتو په ښه والي او د کووید-۱۹ ویروس له منفي اغېزو د وتو لپاره مرسته وکړي.
په راپور کې ویل شوي چې اسیا پراختیايي بانک هم ۱۱ سلنه افغانانو ته د کووید ـ ۱۹ ضد واکسین پیري چې په په وینا یې د نړیوال بانک د مرستو په زیاتېدو سره به نیم میلیون افغانان کرونا ویروس ضد واکسین تر لاسه کړي.
په افغانستان کې تر دا مهاله د کرونا ویروس د څه باندې ۵۶زره مثبتو پېښو ثبتېدو خبر ورکړل شوی دی.
د افغانستان د روغتیا وزارت د معلوماتو په اساس تر دا مهاله ۲۴۶۲ تنه له کرونا ویروس څخه مړه شوي او ۴۹۶۶۴ تنه بیرته روغ شوي دي.
کرونا ویروس د لومړي ځل لپاره د ۲۰۱۹ په ډسمبر میاشت د چین د هوبي ایالت په ووهان ښار کې پيدا شو.
د امریکا د جانس هپکینز پوهنتون د معلوماتو په اساس تر دا مهاله څه باندې ۱۰۰ میلیون کسان په کرونا ویروس اخته شوي او څه باندې دوه میلیونه کسان ورڅخه مړه شوي دي.
