ولسمشرۍ ماڼۍ وایي، له افغانستان څخه به د یو شمېر امریکايي ځواکونو وتل د دغه هېواد پر امنیتي برخې هېڅ ډول تاثیر ونه کړي.
د ولسمشر محمد اشرف غني ویاند هارون چخانسوري د جمعې په ورځ د «لېندۍ پر ۳۰مه» په دې اړه پر خپل ټوېټر ویلي:"دا چې څو زره بهرني سرتېري چې هغه هم تر ډېره د روزنې، تخنیکي مرستو او حمایې چارې پر مخ وړي، که دا وځي دا به په هیڅ توګه په امنیتي برخې تاثیر ونه لري،......"
دا چې څو زره بهرني سرتېري چې هغه هم تر ډېره د روزنې، تخنیکي مرستو او حمایې چارې پر مخ وړي، که دا وځي دا به په هیڅ توګه په امنیتي برخې تاثیر ونه لري،......
— Haroon Chakhansuri (@hchakhansuri) December 21, 2018
ښاغلي چخانسوري ویلي له افغانستان څخه د امریکايي سرتېرو د وتلو په اړه چې کومې اندېښنې اوس په رسنیو کې مطرح کېږي، تر دې زیاتې ورته اندېښنې په ۲۰۱۴ کال کې له افغانستان څخه د څه باندې یولک امریکايي سرتېرو د وتلو به اړ هم مطرح کېدې چې د نوموړي په وینا افغان ځواکونو په خپلو قربانیو دغه تحلیلونه «غلط» ثابت کړل او د افغانستان له ارضي تمامیت او خلکو څخه یې په «مېړانه» دفاع وکړه.
نوموړي لیکلي چې په تېرو څلورنیمو کلونو کې د لومړۍ کرښې جګړه او د هېواد ټول امنیت د افغان ځواکونو لخوا تر سره شو.
په تېرو څلور نیمو کلونو کې د لومړۍ کرښې جګړه او د ټول هېواد عام او تام امنیت د همدغه ځواکونو له خوا ترسره شو او د تپل شوي جنګ له شدت سره سره په دغه موده کې زموږ ملي وسله وال ځمکني او هوايي ځواکونه ورځ په ورځ پياوړي شول او لا هم پياوړتیا په لور روان دي.
— Haroon Chakhansuri (@hchakhansuri) December 21, 2018
دا په داسې حال کېده چې تېره ورځ رویټرز اژانس او نیویارک ټایمز ورځپاڼې رپور ورکړ چې د امریکا ولسمشر ډونالد ټرمپ له افغانستان څخه د یو شمېر امریکايي سرتېرو پر را ایستلو غور کوي.
نیویارک ټایمز ورځپاڼې ویلي و چې ولسمشر ټرمپ په راتلونکو څو میاشتو کې ٧٠٠٠ عسکر له افغانستان څخه باسي.
د امریکا د دفاع وزارت د معلوماتو لهمخې دا مهال ١۴زره امریکایي سرتېري په افغانستان ماموریت ترسره کوي چې عمده برخه یې د افغان ځواکونو روزل دي.
په افغانستان کې د امریکا په ١٧کلنه جګړه کې چې د دې هېواد اوږده جګړه بلل کېږي څه د پاسه ٢۴٠٠ امریکایي سرتېري وژل شوي دي.