په افغانستان کې مېشت امریکايي ځواکونه وايي، د تاوتریخوالي کمېدو په اړه تر ۱۱ ورځنۍ وقفې وروسته یې نن چهارشنبه په هلمند ولایت کې پر وسله والو طالبانو هوايي برید کړی دی.
په افغانستان کې د امریکايي ځواکونو ویاند سوني لګټ نن چهارشنبه د « کب۱۴مه» پر خپل ټوېټر لیکلي چې دغه هوايي برید په نهرسراج ولسوالۍ کې پر طالبانو باندې شوی دی.
هغه ویلي: "امریکايي ځواکونو د مارچ پر څلورمه د طالبانو پر ضد د هلمند ولایت په نهر سراج ولسوالۍ کې په داسې حال هوايي برید وکړ چې طالبانو د افغان ځواکونو پر پوستو برید کړی و، دا د برید د ګډوډلو لپاره دفاعي برید و، دا په تېرو ۱۱ ورځو کې د طالبانو پر وړاندې زموږ لومړنی برید و."
The US conducted an airstrike on March 4 against Taliban fighters in Nahr-e Saraj, Helmand, who were actively attacking an #ANDSF checkpoint. This was a defensive strike to disrupt the attack. This was our 1st strike against the Taliban in 11 days.
— USFOR-A Spokesman Col Sonny Leggett (@USFOR_A) March 4, 2020
نوموړي زیاته کړې چې دغه برید یې د افغان سرتېرو پر پوستو د طالبانو د برید د ګډوډلو په هدف کړی دی.
هغه په دغه برید کې طالبانو ته د اوښتې مرګ ژوبلې په اړه څه نه دي ویلي.
ښاغلي لګت ویلي: "طالبانو ژمنه کړې وه چې تاوتریخوالی به کم کړي او بریدونه به نه زیاتوي،موږ پر طالبانو غږ کوو چې غیر ضروري بریدونه ودروي او خپلې ژمنې عملي کړي."
نوموړي زیاته کړې چې نړیوال ځواکونه به د اړتیا پر مهال له خپلو ملګرو «افغان ځواکونو» څخه دفاع کوي.
په افغانستان کې د امریکايي ځواکونو ویاند زیاتوي:"وضاحت- موږ سولې ته ژمن یو، بیا هم موږ مسؤلیت لرو چې زموږ د ملګرو څخه دفاع وکړو. افغان او متحده ایالاتو زموږ تړونونه منلي دي."
To be clear- we are committed to peace, however we have the responsibility to defend our #ANDSF partners. #Afghans & US have complied w/ our agreements; however, Talibs appear intent on squandering this opp. and ignoring the will of the people for #peace. #Showyourcommitment
— USFOR-A Spokesman Col Sonny Leggett (@USFOR_A) March 4, 2020
امریکا او طالبانو په افغانستان کې د سولې راوستلو په هدف د فبرورۍ پر ۲۹مه په دوحه کې د سولې تړون لاسلیک کړ.
وسله والو طالبانو هم تر دا مهاله په هلمند کې د امریکا له لوري د دوی پر جنګیالیو د دغه تازه برید په اړه څه نه دي ویلي.
بلخوا د افغانستان د کورنیو چارو وزارت ویاند وايي، په تېرو ۲۴ ساعتونو کې په ۱۵ ولایتونو کې طالبانو ۳۰ بریدونه کړي دي.
د دغه وزارت ویاند نصرت رحیمي نن چهارشنبه ویلي چې په دغو بریدونو کې ۱۱ افغان سرتیري او څلور ملکي وګړي وژل شوي او ۱۷ نور ټپیان شوي دي.
هغه همدارنګه زیاتوي چې د افغان ځواکونو په دفاعي بریدونو کې هم ۱۷ وسله وال طالبان وژل شوي او ۱۱ نور ټپیان شوي دي.