د متحده ایالاتو جمهور رئیس او د ۲۰۲۴ کال جمهوري ریاست انتخاباتو لپاره د دیموکرات ګوند کاندید، جو بایډن یکشنبه جولای ۲۱ (چنګاښ ۳۱) اعلان وکړ چې له کاندیدۍ تیریږي.
جمهور رئیس په اعلامیې کې ژمنه کړې چې د جمهوري ریاست پاتې دوره به پوره کوي چې د ۲۰۲۵ کال د جنوري میاشتې په ۲۰ مې پای ته رسیږي.
د متحده ایالاتو مشر په اعلامیې کې چي د اکس په شبکې کې خپره شوې ویلي، "دا مې د ژوند تر ټولو غوره ویاړ و چې ستاسو د جمهور رئیس په توګه مې خدمت وکړ.که څه هم چې بیا انتخاب کیدل مې نیت و، زه باور لرم چې دا د هیواد او ګوند په ګټه ده چې استعفا وکړم او په پاتې دورې کې یوازې د جمهور رئیس په توګه پخپلې دندې تمرکز وکړم".
سره لدې چې ښاغلي بایډن په لومړنۍ اعلامیې کې د خپل ځای ناستې په هکله څه نه و ویلي، خو لږه شیبه وروسته یې د ګوند کاندیدې په توګه د خپلې اوسنۍ مرستیالې، کاملا هریس سره ملاتړ څرګند کړ.
My fellow Democrats, I have decided not to accept the nomination and to focus all my energies on my duties as President for the remainder of my term. My very first decision as the party nominee in 2020 was to pick Kamala Harris as my Vice President. And it’s been the best… pic.twitter.com/x8DnvuImJV
— Joe Biden (@JoeBiden) July 21, 2024
جو بایډن پدې هکله لیکلي، " نن غواړم د جمهور رئیس د مرستیالې، کاملا هریس سره بشپړ ملاتړ او منظوري اعلان کړم چې سږ کال زمونږ د ګوند کاندیده وي".
ښاغلي بایډن همدارنګه په دیموکراتانو غږ کړی چې د مخکني جمهور رئیس ډونالډ ټرمپ ماتې ورکولو لپاره یو لاس شي.
بایډن چې ۸۱ کاله عمر لري د انتخاباتو په هکله د نظر معلومولو په ملي سرویګانو کې د جمهوري غوښتونکي سیال، ډونالډ ټرمپ په مقابل کې لږ محبوبیت درلود او د جمهوري ریاست له کاندیدۍ یې پداسې حال کې د لاس اخیستو اعلان وکړ چې د کرونا ویروس اخته کیدو له کبله پخپل کور کې قرنطین دی.
د بایډن پر ځای به کاملا هریس د نومبر په میاشت کې د مخکني جمهور رئیس ډونالډ ټرمپ سره سیالي کوي. که چیرته میرمن هریس د دیموکراتانو په ملي کنوانیسون چې د اګست په میاشت کې د شیکاګو په ښار کې دایریږي، د دې ګوند وروستۍ کاندیده شي، دا به د متحده ایالاتو په ۲۴۸ کلن تاریخ کې لومړی ځل وي چې یوه تور پوستې میرمن چې د جنوبي آسیا ریښې هم لري، د یو ستر ګوند د کاندیدې په توګه ټاکل کیږي.
On behalf of the American people, I thank Joe Biden for his extraordinary leadership as President of the United States and for his decades of service to our country.I am honored to have the President’s endorsement and my intention is to earn and win this nomination.
— Kamala Harris (@KamalaHarris) July 21, 2024
میرمن هریس د جمهور رئیس جو بایډن د مشرتابه ستاینه کړې او دا یې د خپل ځان لپاره ویاړ بللی چې د جمهور رئیس لخوا د دیموکرات ګوند کاندیدې په توګه یې د هغه ملاتړ او منظوري تر لاسه کړې. هغې د اکس په شبکې کې لیکلي چې نیت لري د ګوند نوماندي تر لاسه کړي.