د افغانستان جمهور رئيس محمد اشرف غني د مونیخ په شپږ پنځوسم نړیوال امنیتي کنفرانس کې د ګډون لپاره د پنجشنبې په ورځ د فبروري په ۱۳مه (سلواغې ۲۴مه) جرمني ته تللی دی.
ارګ په یوې اعلامیې کې ویلي، چې جمهور رئيس غني به په دې غونډه کې پر ګډون سربیره، د یو شمیر هیوادونو د پلاوي له مشرانو سره هم د کنفرانس په څنډه کې وویني او د سولې او امنیت په ګډون به د افغانستان په اړه پر یو لړ نورو مسلو هم خبرې وکړي.
همدا شان د جمهوري ریاست ویاند صدیق صدیقي په خپل ټیوټر کې لیکلي، چې ښاغل غني به د ځینو هیوادونو له استازو سره د دغه کنفرانس په څنډه کې د افغانستان د سولې او امنیت پر سر بحث وکړي.
President @AshrafGhani leaves for #Germany this morning to attend the 56th Munich Security Conference. The president will be meeting with a number of Foreign Heads of delegations at the sideline of @MunSecConf #MSC2020 discussing AFG peace and security.
— Sediq Sediqqi (@SediqSediqqi) February 13, 2020
د مونیخ نړیوال امنیتي کنفرانس د روانې فبروري میاشتې په ۱۴مه پیلېږي او د همدې میاشتې تر ۱۶مې دوام کوي.
ټاکل شوې چې د مونیخ په شپږ پنځوسم امنیتي کنفرانس کې د نړۍ څه باندې ۵۰۰ جیګپوړې تصمیم نیوونکې څیرې ګډون وکړي او د نړۍ په کچه د اوسنیو کړکېچونو او راتلونکو امنیتي ننګونو باندې خبرې وکړي.
د مونیخ نړیوال امنیتي کنفرانس، چې په لویه کچه په کې د نړۍ امنیتي وضعیت تر بحث لاندې نیول کېږي، هرکال د نړۍ د مختلفو هیوادونو د لوړ پوړو چارواکو په ګډون په جرمني کې جوړېږي.