د ناټو عمومي منشي ینز ستولتنبرګ پر ایران غږ کړی دی چې تاوتریخوالی دې نور نه زیاتوي او له دغه ډول بریدونو دې ډډه وکړي.
ښاغلي ستولتنبرګ په عراق کې د امریکايي او ناټو ځواکونو پر پوځي اډو د ایران د بلاستیکي میزایلو بریدونه غندلي دي.
نوموړي په خپل ټویټر کې لیکلي: "زه په عراق کې د امریکا او ایتلاف د ځواکونو په اډو باندې د ایران د میزایلو بریدونه غندم. ناټو پر ایران غږ کوي چې د تاوتریخوالي د لا زیاتولو څخه دې ډډه وکړي."
I condemn the Iranian missile attacks on US & @coalition forces in Iraq. #NATO calls on Iran to refrain from further violence. Allies continue to consult & remain committed to our training mission in Iraq. pic.twitter.com/6PdXMZxSNB
— Jens Stoltenberg (@jensstoltenberg) January 8, 2020
د فرانسې خبري اژانس د ناټو د یو چارواکي له خولې لیکلي دي چې په دغو بریدونو کې د ایتلاف ځواکونو ته کوم زیان نه دی رسېدلی.
برتانیا هم له ایران څخه غوښتي چې بیا دې داسې بریدونه نه تکراروي او شخړه دې نه زیاتوي.
ایران د چهارشنبې په ورځ (جنوري۸) د قدس ځواکونو د مشر قاسم سلیماني د وژل کیدو په غچ کې په عراق کې د امریکايي ځواکونو پر اډو بریدونه وکړل. ایران وایي دا برید یې د ځان د دفاع په خاطر کړی دی.
ولسمشر ټرمپ وویل چې د بریدونو د زیان په اړه ارزونه روانه ده.
امریکايي ځواکونو د جمعې په ورځ قاسم سلیماني وواژه. ولسمشر ټرمپ قاسم سلیماني یو لوی ترهګر بللی او هغه یې د امریکايي ځواکونو په وژلو تورن کړی و.