د پاکستان د بشري حقونو د چارو وزیرې د صدراعظم عمران خان پر خلاف په افغانستان کې د امریکا د سفیر وروستیو څرګندونو ته تند غبرګون ښودلی دی.
وزیرې شیرين مزاري د افغانستان لپاره د متحدو ایالتونو سفیر جان بس ته” لنډی- ټیټ قدی-“ ویلی دی.
میرمن مزاري په دې پارېدلې چې ولې ښاغلي بس په ټویټر کې عمران خان ته لیکلي ووچې د کرکټ ځینې برخې په ډیپلوماسۍ کې کار نه ورکوي.
Some aspects of #cricket apply well in diplomacy, some do not. @ImranKhanPTI, important to resist temptation to ball-tamper with the #Afghanistan peace process and its internal affairs. #AfgPeace
— John R. Bass (@USAmbKabul) March 27, 2019
جان بس د کرکټ د بال ټیمپرنګ خبره کړې وه. بال ټیمپرنګ په کرکټ کې هغه حالت ته وایي چې توپ اچوونکی میدان ته په کتلو د نوي توپ د خرابولو او یا یې اصلي بڼې د بدلولو کوښښ کوي چې مخالف لوري ته ستونزې جوړې کړي.
ښاغلي بس له هغه وروسته دا ټویټ وکړ چې عمران خان ویلي وو چې د افغانستان د ستونزې حل د موقت حکومت جوړول دي. د سفیر بس هدف دا و چې عمران خان ته ووايي چې د افغانستان په داخلي چارو او سولې د بهیر په اړه منفي خبرې ونکړي.
خو ددغو خبرو په ځواب کې د پاکستان د بشري حقونو د چارو وزیرې، شیرین مزاري په خپل ټويټر کې ولیکل:” لنډیه- ټیټ قدیه-! دا خبره ښکاره ده چې د کرکټ، افغانستان اوسیمې په اړه ستاسو معلومات کم دي. ستا ناپوهي ستا خوشبختي نه ده. ”
Clearly you little pygmy your knowledge of ball tampering is as void as your understanding of Afghanistan and the region! Clearly in your case ignorance is certainly not bliss! Another sign of Trumpian mischief a la Khalilzad style! https://t.co/ZOySvWJNDq
— Shireen Mazari (@ShireenMazari1) March 27, 2019
د شیرین مزاري دغو خبرو په خواله رسنیو کې د خلکو ګن غبرګونونه هم پارولي. ځینو لیکلي چې دغه رنګ خبرې د دپلوماتیکي اصولو د پښو لاندې کول دي او ځینو خو لا اندښینه ښودلې چې دغه رنګ خبرې به د امریکا او پاکستان اړیکو باندې ناوړه اغیزې ولري.
شیرین مزاري خپلو منتقیدینو ته هم ځوابونه لیکلي. یو کس ته یې لیکلي " د کومو دیپلوماتیکي اصولو خبرې کوئ؟ امریکايي ديپلوماتان هره ورځ دغه اصول ماتوي، له خلیلزاده نیولې تر دغه ناپوه پورې!"
د پاکستانيو رسنیو د راپور له مخې عمران خان د دوشنبې په ورځ له خبریالانو سره خبرو کې په افغانستان کې د یو بې طرفه موقت حکومت وړاندیز کړی و چې د افغانستان د حکومت لخوا یې په کلکو ټکو غندنه وشوه.
د افغانستان د سولې او بیا پخلاینې لپاره د امریکا ځانګړي استازي زلمي خلیلزاد هم د عمران خان د دغو څرګندونو په اړه ټویټ کړی و. هغه لیکلي وو چې د عمران خان دا ډول څرګندونې د افغانستان د سولې په بهیر کې رغنده رول نشي لوبولی.