د ملګرو ملتونو د ماشومانو د ملاتړ صندوق یا (یونیسف) وايي، په تیر درې میاشتو کې یې په ټول افغانستان کې ماشومانو ته د زده کړې ۵۳۵۰ ټولګي برابر کړي دي.
یونیسف پنجشنبه نومبر ۲۵ (لېندۍ ۴) وویل چې په دې سره په ټول افغانستان کې ۱۴۲۷۰۰ ماشومانو ته د زده کړو امکانات برابر شوي دي.
خو د ملګرو ملتونو د ماشومانو د ملاتړ صندوق دا هم ویلي چې په افغانستان کې اوسمهال له څلور میلیونه څخه زیات ماشومان له زده کړو څخه محروم دي چې نیمايي نجونې دي.
In the past 3 months, #UNICEF supported 5,350 community-based education classes ensuring access to learning for more than 142,700 children across Afghanistan.Yet more needs to be done, over 4 million #children are still out of school, more than half are girls. pic.twitter.com/1M3Mnksw10
— UNICEF Afghanistan (@UNICEFAfg) November 25, 2021
یاد سازمان ویلي چې په دې برخه کې زیات کار ته اړتیا ده.
یونیسف د افغانستان په لیري پرتو سیمو کې د څه وخت راپدېخوا له ښوونځیو څخه محروم ماشومانو ته د تعلیم رسولو پروګرام پيل کړی دی.
یونیسف مخکې ویلي و چې په تیرو دوو لسیزو کې په افغانستان کې د تعلیم په برخه کې د پام وړ پرمختګ شوی او په وینا یې د ښوونځیو شمېر دوه برابره شوی دی.
د ملګرو ملتونو د ماشومانو د ملاتړ صندوق ویلي چې په ښوونځيو کې د ماشومانو شمېر له یو میلیون څخه ۹.۵ میلیون ته لوړ شوی دی.
یونیسف په ټولو اړخونو غږ کړی چې په افغانستان کې د ټولو ماشومانو لپاره د تعلیم ملاتړ وکړي.
دا په داسې حال کې ده چې اوس مهال په افغانستان کې له شپږم ټولګي څخه پورته ښوونځي د نجونو پر مخ بند دي، خو تیره ورځ د طالبانو ویاند ذبیح الله مجاهد وویل چې راتلوونکی کال به ښوونځي او تعلیمي مرکزونه د نجونو پر مخ خلاص شي.