د افغانستان د جمهوري ریاست د پلټونکې ادارې چارواکي وايي چې بهر ته د وینټلاټورونو د قاچاق په تړاو خپور شوي راپورونه سم نه دي.
د پژواک خبري آژانس د چنګاښ په دویمه په یو راپور کې ویلي وو چې له افغانستان سره د کروناویروس د مقابلې لپاره د مصنوعي تنفس له مرسته شویو الو (وینټلاټورونو) ۳۲ یې پاکستان ته قاچاق شوي دي.
د افغانستان د جمهوري ریاست د پلټونکې ادارې مشرې غزال حارث نن شنبه د جولای ۲۵مه (زمري۵مه) د خپلو څیړنو د ابتدايي راپور د وړاندې کولو پر مهال خبریالانو ته وویل چې په دې برخه کې د دوی روانې څیړنې ښيي چې د مرسته شویو ۶۳ وینټلاټورونو له شمېرې ۵۶ یې موجود دي.
هغې وویل:"له افغانستان سره د مرسته شویو وینټلاټورونو قاچاق زموږ له نظره منتفي دی، ځکه چې د ۶۳ وینټلاټورونو له ډلې موږ ۵۶ وینټلاټورونه تشخیص او تثبیت کړل".
اغلې حارث وویل چې د روغتیا په سکتور کې د فساد په تړاو لاهم پلټنې روانې دي خو پر وینا یې د یو شمیر ادارو له خوا په دې برخه کې د همکارۍ نه کول د څیړنو په بشپړولو کې د خنډ او ځنډ لامل شوی دی.
- د ولایتي بودجې په لګولو کې ستونزې
د افغانستان د جمهوري ریاست د پلټونکې ادارې مشرې دغه راز وویل چې په ولایتونو کې له کروناویروس سره د مبارزې د ځانګړې شوې بودجې په مصرفولو کې جدي ستونزې شته دي.
د غزال حارث پر وینا په اکثرو ولایتونو کې د کروناویروس له بودجې څخه ناوړه استفاده شوې او همداشان د اړتیا وړ توکي په خورا لوړو بیو پیرودل شوي دي.
اغلې حارث وویل: "دویم مورد غیرضروري پیرودنې دي، په خواشینۍ سره موږ په ځینو ولایتونو کې د غیرضروري توکو د پیرودلو شاهدان وو، په داسې حال کې چې پیسې د کرونا لپاره ځانګړې شوي، خو په ځینو ولایتونو کې د بیلګې په توګه د خوب تخت، د کمرې لینز، ډېر لوی ۷۵ انیچه تلویزیونونه او د موبایل سیټونه پیرودل شوي دي".
د حکومت د پلټونکې ادارې مشرې زیاته کړه چې دا څیړنې یوازې په څلورو ولایتونو کې شوي او وې ویل د ټولو ولایتونو د بودجې په تړاو څیړنې زیات وخت ته اړتیا لري.
په روغتیا وزارت کې کمزوری مدیرت، د استخدام په پروسه کې ستونزې او له طبي تجهیزاتو څخه د سمې استفادې لپاره د ظرفیتونو نشتوالی نورې هغه ستونزې دي چې د حکومت پلټونکې ادارې په خپل ابتدايي راپور کې ورته اشاره کړې ده.
د افغانستان د روغتیا وزارت تراوسه په دې اړه غبرګون نه دی ښودلی.