د بلخ د ولایتي شورا غړی محمد آصف مهمند وايي د دغه ولایت په هوايي ډګر کې ایسار شوی دی. ښاغلي مهمند امریکاغږ ته وویل چې د بلخ د والي عطامحمد نور وسله والو کسانو هوايي ډګر محاصر کړی دی.
بل لور ته د بلخ د والي ویاند بیا امریکاغږ ته وویل چې ښاغلی محمد د کورنیو چارو وزارت په امر او د اداري فساد په تور، نیول شوی دی.
د بلخ د والي ویاند منیر احمد فرهاد دا هم وویل چې د هوايي ډګر چاپیره وسله وال "د حزب اسلامي د قومندان جمعه خان همدرد د زوی ګل رحمن همدرد کسان" وو.
د ښاغلي عطا محمد نور ځینو پلویانو او خبریالانو په ټولنیزو رسنیو کې د ښاغلي مهمند د نیولو په اړه د "کورنیو چارو د وزارت او لویې څارنوالۍ حکمونه" خپاره کړي دي.
These are governmnt arrest warrant for Assif Mohmand, member of Balkh PC who is accused of many wrong doings- source. HIG have besieged MeS pic.twitter.com/f3l8ZMHmCh
— Tahir Qadiry (@tahirqadiry) August 14, 2017
په هغې فیسبوک پاڼې کې چې ښاغلي مهمند ته منسوب کیږي، لیکل شوي چې "زور ته نه تسلیمیږو".
ښاغلي مهمند له ځینو رسنیو سره په خبرو کې د بلخ په والي عطا محمد نور انتقادونه کړي وو، هغه یې "زورواک او مستبد" بللی و.
د بلخ د والي ویاند وویل چې پولیسو د بلخ د ولایتي شورا دغه وکیل د فساد په تور ونیوه او ټاکل شوې چې د سه شنبې په ورځ عدلي او قضايي څانګوته وپېژندل شي.