د افغانستان کرکټ بورډ په کابل کې د نوروز په مناسبت د ملي لوبغاړو ترمنځ د کرکټ یوه دوستانه او تفریحي لوبه جوړه کړې وه.
د ملي لوبغاړو څخه دوې لوبډلې جوړې شوې وې. د ګلبدین نایب په مشرۍ لوبډله "افغانستان بلو" او د حضرت الله ځاځي په مشرۍ لوبډله "افغانستان رېډ" نومول شوې وه.
د لوبې لېدو ته ګڼ مینوال ورغلي وو
افغانستان رېډ لوبډلې په لسو اورونو کې مخالفې لوبډلې ته د ۱۲۴ منډو هدف وټاکه چې د ګلبدین نایب په مشرۍ د "افغانستان بلو" لوبډلې پوره او لوبه یې وګټله.
دا لوبه د پنجشنبې په ورځ (مارچ۲۱) په کابل ښار کې په ایوبي کرکټ لوبغالي کې وشوه. لوبه د ۱۰ اورونو وه.
دواړې لوبډلې د افغانستان د ملي لوبغاړو څخه جوړې شوې وې
تر ټولو ډېرې ۵۷ منډې د افغانستان رېډ د لوبډلې لوبغاړي، نجیب ترکي وکړې. د دغې لوبې هدف د افغانانو او کرکټ مینوالو لپاره د تفریح برابرول وو.