د افغانستان د کورنیو چارو وزارت وايي د چهارشنبې په ماښام (نومبر۲۷) په کندز کې د سړک غاړې ماین یوې چاودنې ۱۵ ولسي خلک ووژل.
پېښه د کندز ولایت د امام صاحب ولسوالۍ د امام الدین په څلور لارې کې شوې ده.
د کورنیو چارو وزارت ویاند نصرت رحیمي په خپل ټویټر کې دا د وسله والو طالبانو کار بلل دی.
حوالی ساعت 5 شام امروز یک حلقه ماین ضد وسایط که توسط طالبان تروریست در منطقه چهارراهی امام الدین مربوط ولسوالی امام صاحب ولایت کندز جاسازی گردیده بود حین عبور یکعراده واسطه سراچه انفجار نموده که در نتیجه 15 نفر ملکی شهید و 2 نفر ملکی دیگر مجروح گردیده اند.
— Nasrat Rahimi (@NasratRahimi12) November 27, 2019
ویل کیږي چې په پېښه کې دوه تنه نور ژوبل شوي دي. سیمه ایزې رسنۍ وايي چې دا خلک په سراچه ډول موټر کې ناست وو او یو واده ته تلل چې چاودنه پرې شوې ده.
تر اوسه د دغه برید مسولیت چا په غاړه نه دی اخیستی. په وژل شویو کې ښځې او ماشومان هم شامل دي.
دا ملکي کسان داسې مهال وژل کیږي چې ملګرو ملتونو په افغانستان کې د ملکي تلفاتو له کبله اندېښنه ښودلې ده. یوناما وايي چې د روان کال په نهو میاشتو په روان تاوتریخوالي کې ۲۵۶۳ ملکیان وژل شوي دي.
په دغه تاوتریخوالي کې ۵۵۷۶ کسان نور ژوبل شوي هم دي. یوناما وايي دا ۲۰۱۴ کال راپدیخوا تر ټولو ډېر ملکي تلفات دي چې په نهو میاشتو کې اوښتي دي.
د ملکي تلفاتو ډېره برخه د وسله والو طالبانو د بریدونو له کبله بلل شوي. د یوناما په راپور کې په ملکي تلفاتو کې حکومتي ځواکونه او "حکومت پلوه" عناصر هم ګرم بلل شوي.