د افغانستان د دفاع وزارت وايي د دوي یوه پوځي چورلکه د تخار ولایت په رستاق ولسوالۍ کې د "تخنیکي ستونزو" له کبله نسکوره ده.
د دفاع وزارت د سه شنبې په ورځ، سپټمبر ۱ (وږی۱۱) په یوې اعلامیې کې لیکلي چې MI17 ډوله چورلکه له کندز نه تخار ته روان وه چې د کښېناستو پر مهال نسکوره شوه.
اعلامیې کې راغلي چې ددغې پېښې له کبله د چورلکې سورلۍ ته زیان ندی رسیدلی.
د تخار د والي ویاند محمد جواد هجري خبریالانو ته ویلي دي چې دغې چورلکې د افغان پوځیانو مړي انتقالول.
څه موده مخکې، د هلمند په کجکي ولسوالۍ کې د افغانستان د پوځ «بلک هاک» چورلکه نسکوره شوې وه چې له کبله یې پنځه تنه ووژل شول.
لدې وړاندې، د فراه په ولایت کې هم یوه پوځي الوتکه نسکوره شوې وه چې له کبله یې دوه پیلوټان ووژل شول.
د دفاع وزارت په اعلامیې کې راغلي چې د تخار د پېښې په اړه څېړنې پیل شوي دي او جزئیات به یې د څېړنو له پای ته رسېدو وروسته خپاره شي.