د پکتيا د ولايتي شورا مرستيال ايوب غروال نن سهار په يوه وسله وال بريد کې وژل شوی دی.
د پکتيا والي محمد حليم فدايي نن شنبه سپټمبر۱۹(۲۹)پر خپل ټوېټر ليکلي چې ايوب غروال سهار شاوخوا پنځه بجې د ګردېز ښار اړوند بلند منزلو سيمه کې داسې مهال تر وسله وال بريد لاندې راغلی، چې پوهنتون ته پر لار و.
متاسفانه د پکتیا د ولایتي شورا مرستیال ایوب غروال د ګردیز ښار بلند منزلونو ساحه کې نن سهار ۵ بجو شا او خوا کې د وسله والو له لورې په داسې حال کې چې پوهنتون ته روان وو لومړی په ډزو وېشتل کېږې او وروسته په روغتون کې ساه ورکوي. دعاملینو د معلومولو او تعقیب لپاره هڅې روانې دي.
— Halim Fidai (@GovFidai) September 19, 2020
د نوموړي په وينا هغه لومړی ټپي او وروسته يې په روغتون کې ساه ورکړه.
والي محمد حليم فدايي د دې بريد د عاملينو د معلومولو او تعقيب په هکله د هڅو خبر ورکړی دی.
د پکتيا د ولايتي شورا رئيس عبدالمالک ځاځی وايي چې ايوب غروال د دغه ولايت په يوه خصوصي پوهنتون کې د حقوقو پوهنځي محصل و او نن يې له مونوګراف څخه د دفاع ورځ وه.
له ارګ څخه په خپره شوې اعلامیه کې ولسمشر غني د ایوب غروال د مړینې په اړه اندېښنه ښودلې او امنیتي ارګانونو ته یې په دې اړه د څېړنو امر کړی دی.
جمهوررئیس د دغه تروریستي برید د سخت غندلو پرمهال اړوندو ارګانونو ته د پېښې د هر اړخیزې ارزونې او د عاملینو د تشخیص او مجازات په اړه لارښوونه وکړه او په ټینګار سره یې وویل، د تروریستانو او جنایتکارو پر وړاندې به زموږ د امنیتي او دفاعي ځواکونو مبارزه ادامه ولري.
— ارگ (@ARG_AFG) September 19, 2020
ولسمشر غني په هیواد کې د سولې ټینګېدو او تاوتریخوالي د پای ته رسېدو په هدف یو ځل بیا پر وسله والو طالبانو د اوربند ټینګولو غږ کړی دی.
تر اوسه د دې بريد مسؤليت چا پرغاړه نه دی اخيستی او نه هم وسله والو طالبانو په دې اړه څه ويلي دي.