د متحدو ایالتونو ولسمشر جوبایډن هغه لایحه لاسلیک کړه، چې د نومبر تر نیمایي پورې د فدرال حکومت لګښتونه برابروي او په دې سره د حکومت د ځینو برخو د تړل کېدو مخه نیسي.
ولسمشر جوبایډن په خپل اکس حساب کې یو تصویر خپور کړی دی چې دا لایحه لاسلیک کوي. نوموړي د کانګرس له غړو څخه غوښتي دي، چې ژر تر ژره دې بېرته خپلو کارونو ته ستانه شي او کلنۍ مالي بودیجه دې تصویب کړي.
د متحدو ایالتونو سنا د شنبې په شپه په یو غیر معمول مجلس کې دا لایحه تصویب کړه او د امضا لپاره یې ولسمشر ته واستوله، چې په لویه کچه د فدرال حکومت د بندیدو مخه ونیول شي.
دا لایحه د متحدو ایالتونو د استازو په خونې کې له تائید وروسته، په سنا کې د ۸۸ موافقو او نهو مخالفو رایو سره تصویب شوه. د استازو په مجلس کې یې ۳۳۵ موافقې او ۹۱ مخالفې رایې ورکړل شوې وې.
د استازو په مجلس کې جمهوري غوښتونکي او په سنا کې بیا دموکراتان اکثریت رایې لري.
د دغې نوې لایحې په اساس به د نومبر د میاشتې تر ۱۷ نېټې پورې د فدرال حکومت لګښتونه برابرېږي. په لایحې کې د بحراني او کړکیچنو حالاتو لپاره د ولسمشر بایډن د ۱۶ میلیارده ډالرو وړاندیز ځای شوی دی، خو له اوکراین سره مرسته په کې شامله نه ده.
I just signed a law to keep the government open for 47 days. There’s plenty of time to pass Government funding bills for the next fiscal year, and I strongly urge Congress to get to work right away.The American people expect their government to work.Let’s make sure it does. pic.twitter.com/ffjwUIPWIt
— President Biden (@POTUS) October 1, 2023
په کانګرس کې په دغې لایحې باندې له رایې اچوونې وروسته ولسشمر بایډن په یوې اعلامیې کې وویل چې د لایحې په تصویب سره «د یو غیر ضروري بحران، چې میلیونونو زیارکښو امریکانو ته به یې بیځایه درد رسوه، مخه ونیوله».
د استازو مجلس مشر کیون مککارتي د حکومت د بندېدو د مخنیوي لپاره دا لایحه وړاندیز کړې وه، یو شمېر سخت درېځو دریځو جمهوري غوښتونکو خبرداری ورکړی و چې د لایحي له منظورېدو وروسته به مک کارتي له مشرۍ څخه لیرې کړي.
په کلنې بودیجې کې ډېر بحث او اختلاف له اوکراین سره د مرستو په اړه دي. روسیې تېرکال په اوکراین باندې یرغل پیل کړ او متحدو ایالتونو له اوکراین سره پوځي او ملکي مرستې پیل کړې. واشنګټن له کیف سره د ۶۰ میلیارده ډالرو مرستو ژمنه کړې چې د ۴۳ ملیاردو څخه یې ډیرې پوځي دي.
د امریکا په کانګرس کې جمهوري غوښتونکي او دموکراتان دواړه یې د اوکراین سره د مرستو ملاتړ کوي خو دا چې په امریکا کې د ۲۰۲۴ کال د جمهوري ریاست انتخابات نږدې کیدونکي دي، د رای ورکوونکو لپاره ښایي د اوکراین سره مرستې چندانې مهمه موضوع نه وي.
پدې انتخاباتو کې کاندیدان هم د رای ورکوونکو د زړونو ګټلو لپاره یوازې د اوکراین سره په مرستو ډیر ټینګار نکوي.
د امریکا اقتصاد، روغتیایي خدمات، کډوالي، د سقط جنین حقوق او ځیني نور کورني موضوعات هغه څه دي چې امریکایي رای ورکوونکي ورته ډیر پام کوي او د همدې موضوعاتو له مخې د راتلونکو جمهوري ریاست انتخاباتو لپاره خپل د خوښې کاندید غوره کوي.