د شاهین ۲۰۹ قول اردو وايي چې د فاریاب ولایت په قیصار ولسوالۍ کې په یو کور او بازار باندې د طالبانو د هاوان لګېدو ملکیانو ته مرګژوبله اړولې ده.
د دې قول اردو ویاند حنیف رضايي د پنجشنبې په ورځ مې ۲۷ (غبرګولي ۶) وویل تېره ورځ طالبانو د قیصار ولسوالۍ د پولیسو په قوماندانۍ باندې د هاوانونو برید وکړ خو هاوانونه په یو کور او د ولسوالۍ په بازار کې ولګېدل.
هغه وویل: "د څو هاوانونو د ویشتلو له امله چې د خلکو په کورونو او د ولسوالۍ په بازار باندې لګېدلي دي، په خواشینۍ سره اوه ملکیان شهیدان شوي او ۹ نور ټپیان دي".
د شاهین د ۲۰۹ قول اردو د ویاند په وینا د هاوانونو د لګېدلو له امله د ملکي مرګژوبلې تر څنګ د قیصار ولسوالۍ اوسېدونکو ته زیات مالي زیانونه هم اوښتي دي.
وسلهوالو طالبانو تراوسه په دې اړه رسنیو ته څه نه دي ویلي.
د فاریاب پولیس وايي چې د هاوانونو په دغو بریدونو کې دوه پولیس هم ټپیان شوي دي.
ننګرهار کې چاودنه
د ننګرهار والي ضیاالحق امرخیل وايي چې ددغه ولایت د کامې د ولسوال په موټر باندې د مقناطیسي ماین چاودنه شوې ده.
ښاغلي امرخیل په خپل ټویټر کې لیکلي چې په دې چاودنه کې د کامې ولسوال شریفالله فضلي، د هغه یو ساتونکی او یو ملکي وګړی ټپيان شوي دي.
د ښاغلي امرخیل په وینا چاودنه نن سهار د بهسودو ولسوالۍ په دامان سیمه کې هغه مهال شوې چې ښاغلی فضلي د خپل دفتر په لور روان و.
هغه زیاته کړې چې د ټپیانو روغتیايي وضعیت ښه دی.
د دې چاودنې مسولیت تراوسه چا نه دی منلی.