د افغانستان جمهوري ریاست وايي، په مالي چارو کې د سرغړونو له امله افغان ولسمشر د مخابراتو او معلوماتي ټکنالوژۍ وزیر عبدالرزاق وحیدي دنده ځنډولې ده.
د افغان ولسمشر مرستیال ویاند دواخان مینهپال امریکا غږ ته وویل، په حکومت کې دننه د پلټونو پر مهال د مخابراتو د وزیر په خلاف یو شمیر اسناد ترلاسه شوي دي، چې د پلټنو تر بشپړیدو د هغه دنده ځنډول شوې ده.
د ولسمشر د ویاند مرستیال زیاته کړه، چې د ښاغلي وحیدي پر سر د لګیدلو تورونو د څیړلو لپاره یو پلاوی ټاکل شوی دی.
ښاغلي مینهپال وویل "د دغه پلاوي د څیړنو د نتایجو تر روښانه کیدو، د مخابراتو د وزیر دنده ځنډول شوې ده."
پر عبدالرزاق وحیدي د لیګیدلو مالي تورونو د څرنګوالي جزئيات لا تر اوسه څرګند شوي نه دي.
د افغانستان د مخابراتو او ټکنالوژۍ وزارت وايي، چې دغه وزارت او وزیر یې د قانون په وړاندې ځوابویونکي دي.
د مخابراتو د وزارت ویاند یاسین صمیم امریکا غږ ته وویل، ښاغلي وحیدي د چارو د ادارې په ګډون له ټولو هغو پلاوو سره، چې د دغه وزارت چارې یې څیړلې، همکاري کړې ده او تر لاس لاندې ټولو ادارو ته یې هم د همکاریو امر کړی دی.
هغه وویل "تر هغې چې تحقیق بشپړ شوی نه وي، د وزیر دنده به د ځنډ په حالت کې وي او د تحقیق له نتایجو وروسته د حکومت رهبري به په دې اړه پریکړه وکړي."
ښاغلی وحیدي د افغانستان د کابینې په هغو اوو وزیرانو کې شامل دی، چې د ولسي جرګې له خوا بېواکه شوي دي.
عبدالرزاق وحیدي د ۱۳۹۴ کال په جدي میاشت کې هم په خپل وزارت کې د بېځایه ګومارنو او اداري فساد له امله د ولسي جرګې له خوا استیضاح شوی وو، خو هغه مهال یې د وکیلانو باور بیرته ترلاسه کړ.