د پاني پت فلم په اړه د یو شمیر افغانانو له غبرگونونو وروسته اوس د هند د راجستان ایالت اوسیدونکو ددغه فلم داستان غندلی او په ضد یې اعتراضونه کړي دي.
د "انډیا ټوډې" د رپوټ له مخې د راجستان ایالت اوسیدونکي د پاني پت فلم پر ضد مظاهرې کړي او ویلي یې دي چې پدې فلم کې د "جټ" قوم ناسم انځور نندارې ته وړاندې شوی دی.
د پاني پت فلم؛ یو ستر خیانت: د افغان پاچا احمدشاه ابدالي په وړاندې د هند د مرهاټانو ماتې د هند د یو شمیر محلي پاچاهانو خیانت گڼل شوی دی.
پدغه فلم کې وروسته له هغه چې د مرهاټه د سرلښکر له لورې د جټ د محلي پاچا سورج مل غوښتنه رد کیږي د ابدالي لښکر پر ضد جگړې نه ډډه کوي چې دغه کار د مراهاټانو د کمزورتیا سبب کیږي.
د راجستان اوسیدونکو ادعا کړې ده چې دغه فلم راجستانی پاچا ناسم انځور کړی دی او د هغه په هکله ناسم پیغام نندارې ته وړاندې کوي. د هند جټانو د پاني پت د فلم د ډایرکټر اشیتوش گواریکر، مجسمه هم وسوزوله.
د راجستان ایالت د سیاحت وزیر وشویندر سنگ، په خپل ټویټر پاڼه لیکلي چې د پاني پت په فلم کې تاریخي پیښې غلطې وړاندې شوې دي.
هغه لیکلي: "په هریانا، راجستان او د هند د شمال په نورو سیمو کې د جټانو د ټولنیزو اعتراضونو په رڼا کې زه پدې باور یم چې د عامه نظم د گډوډۍ د مخنیوي لپاره باید ددې فلم ننداره بنده شي".
In light of the vociferous protest by the Jat community in Haryana, Rajasthan and other regions of North India, I believe that the film should be banned to avoid a law and order situation. @ashokgehlot51 @VasundharaBJP @SachinPilot @KatariaLalchand @SatishPooniaBJP @Barmer_Harish
— Vishvendra Singh (@vishvendrabtp) December 8, 2019
یو شمیر افغانانو چې دغه فلم یې د امریکا په متحده ایالاتو کې کتلې د امریکا غږ سره په خبرو کې ددې فلم داستان یوه "تاریخي پیښه نه بلکه د ساعتیرۍ یوه صحنه" گڼلې ده چې ددې فلم په لیدلو یې "وخت او پیسې" ضایع کړي دي.
ددې فلم افغان منتقدین همداشان وایي چې د پاني پت په فلم کې هندیان متمدنه او ارام خلک او برعکس افغانان بد خویه، بې فرهنگه او بې تمدنه انځور شوي دي.
د هندي رسنیو د رپوټونو له مخې د پاني پت فلم تر اوسه ندی توانیدلی چې ښه عاید ترلاسه کړي.