د پاکستان پوځي چارواکي وايي، له تېرې ورځې راپدېخوا له هند سره پر کنټرول کرښه څلور پاکستاني پوځیان وژل شوي دي.
د پاکستان د پوځ ویاند ویلي، چې یاد سرتېري د هندي پوځیانو د ډزو له امله وژل شوي دي.
د دغه هېواد د پوځ ویاند اصف غفور پر خپل ټوېتر ویلي، چې د یاد پوځیانو له ډلې درې تنه یې تېره ورځ او یو سرتېری نن جمعه «د اګست پر۱۶مه»د هندي پوځیانو لخوا وژل شوی دی.
Another brave son of soil laid his life in the line of duty. Sepoy Muhammad Sheeraz embraced shahadat due to Indian firing in Buttal Sector along LOC. pic.twitter.com/BAozVnsuGY
— DG ISPR (@OfficialDGISPR) August 16, 2019
د پاکستان پوځي چارواکو همدارنګه ویلي، چې د دوی د سرتېرو په ډزو کې پنځه هندي سرتېري هم وژل شوي او یو شمېر نور ټپیان شوي، خو د هند حکومت لا تر دا مهاله په دې اړه څه نه دي ویلي.
د پاکستان پوځي چارواکو د یادو ډزو له امله هندي سرتېري له اوربند څخه په سرغړونې تورن کړي دي.
دا په داسې حال ده چې روانه میاشت د هند صدراعظم نریندرا د هند تر ولکې لاندې کشمیر ځانګړی حیثیت ختم کړ، د هند او پاکستان ترمنځ د یوې بلې جګړې د امکاناتو په اړه بحثونه پاریدلې دي.
پرون د اګست ۱۵مه چې د هند د خپلواکۍ ورځ وه د پاکستان په بېلابېلو سیمو کې خلکو د تورې ورځې په توګه وغندله.
بلخوا ټاکل شوې نن جمعه د ملګرو ملتونو امنیت شورا د کشمیر په اړه د بندو دروازو تر شا غیر رسمي غونډه وکړي.