د افغانستان لپاره د اروپايي ټولنې ځانګړي استازي توماس نیکلاسن وايي د هغو افغانانو نیول یې غیر قانوني دي چې د خپلو حقونو څخه دفاع کوي.
نوموړي دا غبرګون تر هغه وروسته ښودلی دی چې طالبانو په افغانستان د ښځو د حقونو او د مدني ټولنو یو شمېر فعالان ونیول.
توماس نیکلاسن د سه شنبې په ورځ اکتوبردرییم ( تلې ۱۱) د ایکس په ټولنیزه شبکه کې په خپله پاڼه د طالبانو له بند څخه د ندا پرواني، ژولیا پارسي او مطیع الله ویسا د خوشې کیدو غوښتنه کړې ده.
هغه لیکلي: "د هغو افغانانو په خپلسر نیولو په اړه، چې د خپلو او نورو له حقونو دفاع کوي، غیرقانوني دي. هغوی همدا شان په کور دننه د مشروعیت لپاره لازم باور او رغنده ډیالوګ کمزوری کوي."
Arbitrary arrests of Afghans standing up for their rights, and the rights of others, are illegal. They also weaken the trust necessary for building domestic legitimacy and constructive dialogue.#FreeMatiullah #FreeZholia #FreeNeda https://t.co/l1xEvVqZ5S
— Tomas Niklasson (@tomas_niklasson) October 3, 2023
د اروپايي ټولنې د بهرنۍ پالیسۍ او امنیت لپاره ددغې څانګې ویاندې میرمن نبیلا مسرالي هم د دوشنبې په ورځ د ایکس په ټولنیزه شبکه کې په خپله پاڼه د طالبانو د چارواکو څخه په خپلسر نیونو د بهیر د بندیدو غوښتنه کړې وه.
میرمن نبیلا مسرالي د ښځو د حقونو ددغو دوو فعالانو ندا پرواني او ژولیا پارسي اوهم د نجونو د زده کړو د ملاتړي او د "قلم لار" د ټولنې د مشرمطیع الله ویسا د خوشې کیدو غوښتنه کړې وه.
د رپوټونو له مخې طالبانو امنیتي ساتوونکو د سپټمبر ۱۹ (وږي ۲۸) ندا پرواني د خپل څلورکلن زوی او میره سره نیولې ده او د هغې وروسته یې ژولیا پارسي له خپل زوی سره د سپتمبر په ۲۷ مه (تلې پنځمه) د کابل ښار په قلعه فتح الله ساحه کې ونیوله، چې دا دواړه فعالانې لا هم د طالبانو په توقیف کې دي.
خو د نجونو د زده کړو د ملاتړي او د "قلم لار" د ټولنې مشرمطیع الله ویسا له شپږو میاشتو څخه د زیاتې مودې راهیسې طالبانو سره بندي دی.
د بخښنې نړیوال سازمان او افغانستان کې د ملګروملتونو مرستندویه پلاوي دفتر" یوناما" هم په جلا جلا اعلامیو کې د ښځو د حقونو ددغو دوو فعالانو او د مدني ټولنې د نورو فعالانو د خوشې کیدو غوښتني کړي دي.
همداشان د ښځو د حقونو ځینو خوځښتونو هم د اعتراضي غونډو او اعلامیو په خپرولو سره ددغو دوو ښځینه فعالانو په ګډون د ټولو فعالانو د خوشې کیدو غوښتنه کړي دي.
د طالبانو حکومت تراوسه ددغو دوو ښځینه فعالانو د نیولو په اړه رسنیو ته څه نه دي ویلي.
طالبانو د ۲۰۲۱ کال په اګست میاشت کې د افغانستان د واک تر لاسه کولو وروسته یو زیات شمېر ښځینه فعالانې، خبریالان، منتقدین او د دوی د حکومت مخالفې څېرې نیولي دي، چې د نجونو د تعلیم فعال مطیع الله ویسا او افغاني الاصله فرانسوۍ خبریال مرتضی بهبودي هم په کې شامل دي چې له څو میاشتو راهیسې د دغې ډلې په توقیف کې دي.
تیره اونۍ یوناما په یوه اعلامیه کې په افغانستان کې د طالبانو د حکومت پر چارواکو غږ وکړ، چې خپلسري توقیفونه ودروي اودا ډاډ ترلاسه کړي چې ټول بندیان کورنیو، وکیلانو او روغتیا پاملرنې ته لاسرسی لري او د عادلانه محاکمې حقونه یې خوندي دي.