وروسته تر هغه چې طالبانو امریکا او د افغان ایتلافیان د سولې له تړون څخه په سرغړونې تورن کړل د افغانستان د ملي امنیت شورا وايي د هیواد ځینو ولایتونو کې د طالبانو وروستي بریدونه بېځوابه نه پرېږدي.
د ملي امنیت شورا ویاند جاوید فیصل پر خپل ټوېټر لیکلي چې افغان ځواکونه له تېرو څو اونیو راهیسې په دفاعي حالت کي دي چې په وینا یې «د طالبانو د بریدونو دوام کولای شي د افغانستان د سولې بهیر ته زیان ورسوي.»
ښاغلي فیصل وویل: "په زابل او بدخشان کې د طالبانو بریدونه بېځوابه نه پرېږدو، موږ د خپلو نړیوالو همکارانو په مرسته طالبانو ته قوي ځواب ورکوو، اوس مسؤلیت وسله والو طالبانو ته متوجه دی چې د سولې په طرف ګامونه اخلي او یا هم خپل تاوتریخوالي او بریدونو ته دوام ورکوي."
3. Aggression like in Zabul and Badakhshan will not go unpunished as we, together with our allies, respond forcefully. The onus is on the Taliban side: The group can choose practical steps toward peace with the nation, or it can choose violence.
— Javid Faisal (@Javidfaisal) April 5, 2020
تېره کب میاشت په زابل او تخار ولایتونو کې د افغان ځواکونو پر مرکزونو د طالبانو په بریدونو کې د لسګونو افغان سرتېرو د وژل کېدو راپور ورکړل شو.
هغه همدارنګه زیاته کړې چې د افغان حکومت او طالب استازو ترمنځ د دواړو لورو د بندیانو خلاصولو په اړه په کابل کې خبرې روانې دي چې په وینا یې طالبان باید تاوتریخوالی بند کړي او د سولې په اړه خپل ژمنتیا ثابته کړي.
د افغانستان د ملي امنیت شورا پر داسې مهال دا څرګندونې کوي چې طالبانو تېره ورځ د یوې اعلامیې په خپرولو سره وویل چې امریکا او د هغوی کورنیو بهرنیو همکارانو له دغه ډلې سره د سولې له تړون څخه سرغړونه کړې ده.
طالبانو ویلي و چې امریکا او د هغوی همکارانو په دې وروستیو کې د یادې ډلې پر وسله والو چاپې وهلي، هوايي او ځمکني بریدونه یې پر کړي او د دغه ډلې د ۵۰۰۰ بندیانو خلاصولو بهیر یې هم ځنډولی چې په وینا یې که دغه سرغړونې دوام پیدا کړي، د سولې تړون ته به زیان ورسوي او دوی به هم متقابل غبرګون ته وهڅوي.
د طالبانو تر اعلامیې وروسته په افغانستان کې د امریکايي ځواکونو ویاند وویل چې دوی د دوحې تړون په اساس ټولو پوځي اصولو ته ژمن دي او په دې اړه یې د طالبانو ادعا رد کړه.
سوني لګټ ویلي که چیري وسله وال طالبان د هغوی پر افغان همکارانو برید وکړي دوی یې دفاع کوي.