په افغانستان کې د سره صلیب نړیوالې کمیټې (ICRC) ویلي چې د روغتیایي چارو د شاوخوا ۱۰ زرو مامورینو میاشتني معاشونه ورکوي.
دې کمیټې نن سه شنبه ډسمبر ۲۱ (لیندۍ۳۰) په ټویټر کې لیکلي چې د دې پریکړې له مخې به په ټول افغانستان کې په ۲۳ سیمه ایزو او ولایتي روغتونونو کې د روغتیایي چارو د مامورینو میاشتنۍ تنخواګانې ورکړل شي.
دې کمیټې په اعلامیې کې زیاته کړې چې دا تنخواګانې او د روغتونونو د فعال ساتلو لپاره لګښتونه او وسایل به تر شپږو میاشتو پورې ورکول کیږي.
The ICRC is proud to support salaries for around 10,000 staff working across 23 regional and provincial hospitals in #Afghanistan. Communities must have access to health care and this is one way that we can help ensure vital health infrastructure can continue to operate. pic.twitter.com/EvGR5VPpw3
— ICRC Afghanistan (@ICRC_af) December 20, 2021
په اعلامیې کې همدرانګه ویل شوي، " خلک باید روغتیایي خدماتو ته لاسرسی ولري او دا یوه لار ده چې مونږ یقیني کړو حیاتي روغتیایي زیربناوې فعالیت ولري".
دغه نړیوال سازمان پداسې وخت کې د افغانستان د روغتیایي مامورینو د تنخواګانو د ورکولو ژمنه کوي چې څه موده وړاندې خبرداری ورکړل شوي چې د افغانستان روغتیایي نظام سقوط ته نږدې شوی.
په افغانستان کې روغتیایي سیستم پداسې حال کې د سختیو سره مخامخ دی چې له یوې خوا ددې هیواد په روغتونونو کې د کویډـ۱۹ په بیمارۍ د اخته ناروغانو شمیر ډیر دی او له بلې خوا د دې ناروغانو د درملنې لپاره لازم دارو درمل هم په کافي اندازه نه پیدا کیږي.
د افغانستان-جاپان په روغتون کې مسؤلین وایي چې د روغتون بسترونه له ناروغانو ډک دي خو د اکسجین د تولید کولو په ماشینونو کې تیل نشته او تقریباً درې میاشتې کیږي چې په روغتون کې ډاکټرانو او کار کوونکو ته تنخواګانې ندې ورکړل شوي.
په افغانستان کې د طالبانو د واکمن کیدو او بهرینو ځواکونو تر وتلو وروسته پدې هیواد کې خلک د سختو اقتصادي ستونزو سره مخ شول. څو میاشتې کیږي چې حکومتي مامورینو ته تنخواګانې ندي ورکړل شوي.
تر دې وړاندې په کابل کې د سردار محمد داود خان د روغتون ډاکټرانو او مامورینو اعتراض کړی و چې څو میاشتې کیږي تنخواګانې یې ندي ورکړل شوي. هغوي خبرداری ورکړی و که تنخواګانې یې ورنکړل شي، خپلې دندې به پریږدي.