د پاکستان صدر اعظم عمران خان نن دوشنبه اپریل څلورمه (وري۱۵) د دغه هېواد پخوانی قاضي القضات ګلزار احمد د موقتې صدراعظمۍ څوکۍ ته کاندید کړ.
د عمران خان د تحریک انصاف ګوند مشر فواد چوهدري په خپل ټویټر کې لیکلي دي چې ښاغلي خان دا پرېکړه د ګوند د مهمې کمېټې له تائید وروسته وکړه.
صدر مملکت کے خط کے جواب میں تحریک انصاف کور کمیٹی سے مشورے اور منظوری کے بعد وزیر اعظم عمران خان نے سابق چیف جسٹس پاکستان جسٹس گلزار احمد کا نام نگران وزیر اعظم کیلئے تجویز کیا ہے
— Ch Fawad Hussain (@fawadchaudhry) April 4, 2022
د پاکستان د ولسمشر دفتر ته په دې اړه په استول شوي مکتوب کې لیکل شوي دي: «زه د پاکستان د پخواني [متقاعد] قاضي القضات ګلزار احمد نوم وړاندیز کوم چې د موقت صدر اعظم ټاکل کېدو لپاره پرې غور وشي. »
د پاکستان د ډان نیوز او جیو تلویزون په حواله دا اعلان له هغه وروسته وشو چې د پاکستان ولسمشر عارف علوي عمران خان او په ملي اسمبلۍ کې د اپوزیسون مشر شهباز شریف ته یو لیک واستوه او له دواړو یې وغوښتل چې دغه مقام ته د خپلې خوښې د وړو کسانونو نومونه ور واستوي. وايي دا کار د پاکستان د اساسي قانون د ۲۲۴ مادې په اساس کوي.
خو ښاغلي شریف په دې برخه کې له همکارۍ څخه انکار کړی. هغه یو خبري کنفرانس ته وویل: « موږ څنګه د یو داسې سړي [ولسمشر] لیک ته ځواب ووایو چې اساسي قانون یې مات کړی دی».
د پاکستان د اساسي قانون په اساس برحاله صدراعظم چې په پارلمان کې د نه باور له رای اچوونې سره مخامخ وي، د ملي اسمبلۍ د منحل کېدو غوښتنه نشي کولای.
په همدې حال کې د پاکستان ستره محکمه د عمران خان په خلاف د مخالفو سیاسي ګوندونو دلایل او قضیه اوري.
سیاسي ګوندونو ایتلاف کړی و چې په پارلمان کې له عمران څخه د باور رایه بېرته واخلي او له واک څخه یې لېرې کړي، خو په یو ناببره اقدام کې د پاکستان ولسمشر د ښاغلي خان په غوښتنه د پاکستان ملي اسمبلۍ منحل کړه.
د ملي اسمبلۍ له منحل کېدو وروسته، اساسآ تر څو پورې چې محکمې کومه پرېکړه نه وي کړې، د نوي انتقالي حکومت تر جوړېدو پورې به عمران خان د هېواد صدر اعظم وي، نوي انتخابات به کېږي او انتقالي حکومت به د انتخاباتو چارې څاري او سمبالوي.
ګلزار احمد د ۲۰۱۹ د ډسمبر په میاشت کې د پاکستان د ۲۷م د قاضي القضات په توګه لوړه وکړه او د ۲۰۲۲ د فبرورۍ تر میاشتې پورې په دې مقام و. هغه په ۱۹۵۷ کې د پاکستان په کراچۍ کې وزېږېده. پلار یې هم وکیل و.