د امریکا د متحده ایالاتو د دفاع وزارت ویلي چې ایران د سه شنبې د ورځې ناوخته (مرغومی ۱۷ مه) له ۱۲ څخه زیات بالستیک توغندي د امریکا او اتئلافي ځواکونو پر پوځي اډو ویشتلي دي.
د عامه اړیکو په برخه کې د امریکا د دفاع وزیر یاور جاناتن هوفمن ویلي چې د توغندیو په دې برید کې لږ تر لږه د امریکا دوې اډې په نښه شوي دي.
د رپوټونو له مخې د ایران د توغندیو په دغو بریدونو کې د عراق د انبار په ولایت کې د عین الاسد په نوم اډه او د کوردستان د خودمختارې سیمې پر مرکز د اربیل ښار کې د امریکا پوځي اډه په نښه شوې ده.
د امریکا د متحده ایالاتو جمهور رئیس ډونالډ ټرمپ د خپل ټویټر په پاڼه لیکلي، چې توغندي له ایران څخه پر دوو پوځي اډو توغول شوي، چې د ممکنه تلفاتو او زیان په اړه پلټنې روانې دي.
ښاغلي ټرمپ لیکلي "تر اوسه هرڅه ښه دي".
ښاغلي ټرمپ په دغه پیغام کې ویلي، چې د امریکا متحده ایالات تر ټولو پیاوړي پوځي ځواکونه لري، چې په ښو وسلو سمبال هم دي.
All is well! Missiles launched from Iran at two military bases located in Iraq. Assessment of casualties & damages taking place now. So far, so good! We have the most powerful and well equipped military anywhere in the world, by far! I will be making a statement tomorrow morning.
— Donald J. Trump (@realDonaldTrump) January 8, 2020
د امریکا د متحده ایالاتو د دفاع وزارت په اعلامیه کې ویلي چې اوس مهال دا وزارت د حالاتو او دغو بریدونو ته د ځواب ورکولو د څرنګوالي په ارزونه بوخت دی.
په دې اعلامیه کې ویل شوي چې په سیمه کې به له ټولو لازمو اقداماتو څخه د امریکايي منسوبینو او د دغه هیواد د شریکانو او متحدینو د ساتنې او دفاع لپاره کار واخیستل شي.
د دفاع وزارت په اعلامیه کې دا هم ویل شوي چې په وروستیو ورځو کې د ایران له خوا پیښو ګواښونو او اقداماتو ته په پاملرنې دغه وزارت د خپلو منسوبینو او شریکانو د ساتنې لپاره له وړاندې یو لړ اقدامات ترسره کړي دي.
د امریکا دفاع وزارت دا هم ویلي، چې دغه وزارت په سیمه کې د ایران د رژیم له خوا پر امریکايي پوځي اډو او تاسیساتو باندې د احتمالي بریدونو ترسره کولو دمخه په نښه شوو اډو کې خپل ځواکونه د تیارسئ په حال کې راوستي وو.
ایراني رسنیو د ایران د اسلامي انقلاب د سپاه پاسداران د ځواکونو له قوله ویلي چې دغو ځواکونو د قدس د ځواکونو د قومندان قاسم سلیماني د وژلو په غچ کې د " شهید سلیماني" عملیات د " یا زهرا" تر شفر لاندې د امریکايي ځواکونو پر وړاندې ترسره کړي دي او په لسګونو د ځمکې څخه ځمکې ته توغندي یې په عراق کې د عین الاسد په اډه ویشتلي دي.
د عین الاسد اډه په عراق کې د امریکا دوهمه تر ټولو ستره پوځي اډه ده، چې د دغه هیواد په لودیځ کې د انبار په ولایت کې موقعیت لري.
امریکايي ځواکونو په عراق کې د اسلامي دولت یا داعش ځواکونو باندې په بمباریو کې له دغې اډې څخه کار اخیسته.
همدا راز د ایران د اسلامي انقلاب د سپاه پاسداران د ځواکونو په اعلامیه کې امریکا متحده ایالاتو ته ګواښ شوی، چې په سیمه کې د میشتو امریکايي ځواکونو له خوا پر ایران باندې برید ترسره شي، تهران به دا اډې په نښه کړي.
د امریکا د متحده ایالاتو د کانګریس رئیسې میرمن ننسي پلوسي ویلي، چې وضعیت له نږدې څاري. میرمن پلوسي د خپل ټویټر په پاڼه په یو پیغام کې د امریکا د متحده ایالاتو له خوا د میرمن پلوسي پر وینا د " بې دلیله او تحریک امیزو" اقداماتو د پای ته رسیدلو غوښتنه کړې ده. میرمن پلوسي له ایران څخه هم غوښتي، چې تاوتریخوالی دی بند کړي. میرمن پلوسي د خپل دغه پیغام په پای کې لیکلي دي، چې " امریکا او نړۍ یو بل جنګ نشي تحمل کولی".
Closely monitoring the situation following bombings targeting U.S. troops in Iraq. We must ensure the safety of our servicemembers, including ending needless provocations from the Administration and demanding that Iran cease its violence. America & world cannot afford war.
— Nancy Pelosi (@SpeakerPelosi) January 8, 2020
امریکا د عراق او افغانستان سربیره په شاوخوا اتیا هیوادونو کې پوځي اډې لري.
افغان حکومت د امریکا او ایران ترمنځ د سیاسي لارې د پیښې شوې شخړې د هواریدو غوښتنه کړې ده. جمهور رئیس محمد اشرف غني د ایران د جمهور رئیس حسن روحاني سره او د امریکا د بهرنیو چارو او د دفاع د وزیرانو سره په جلا تیلیفوني خبرو کې د دې لانجې په سیاسي هواري ټینګار کړی دی.
افغان حکومت ویلي، چې هیچا ته به د کوم هیواد پر خلاف د خپلې خاورې د کار اخیستلو اجازه ورنکړي.