د عامې روغتیا وزیر فیروز الدین فیروز په افغانستان کې د کورونا ویروس د خپرېدو مخنیوي په هدف په کابل کې د چین له سفیره غوښتي چې له هغه هیواد څخه افغانستان ته راتلونکو سوداګریزو شرکتونو استازو او افغانانو ته د پرواز اجازه ورنه کړي.
ښاغلی فیروز پر داسې مهال له چین څخه افغانستان ته د راتلونکو افغانانو د سفر د بندېدو غوښتنه کړې ده چې په دې وروستیو کې په دغه هیواد کې د کورونا ویروس له امله لسګونه چینايي وګړي مړه شوي دي.
د چین او افغانستان ترمنځ ګن شمېر افغان او چینايي سوداګر تګ راتګ کوي او ترڅنګ یې یو شمېر افغان کورنۍ او محصلین هم په دغه هیواد کې مېشت دي.
د دوشنبې په ورځ د «سلواغې پر ۷مه» د عامې روغتیا وزارت لخوا په خپره شوې اعلامیه کې د ډاکټر فیروز الدین فیروز له قوله راغلي:"د وضعیت تر ښه کېدو پوري د سوداګریزو شرکتونو استازو او یو شمېر هغه افغانان چې په دې وروستیو کې دغه هیواد ته تللي، هغوی ته افغانستان ته د پرواز اجازه ورنه کړئ."
د افغانستان د روغتیا وزیر د چین له سفیر سره ټلیفوني خبرو کې د دغه هیواد په ووهان او نورو ښارونو کې د مېشتو افغانانو په اړه د اندېښنې په څرګندولو سره له نوموړي غوښتي چې د هغوی روغتیا ته لازمه توجه وکړي.
په افغانستان کې د چین سفیر وانګ یو هم پر خپل ټوېټر ډاډ ورکړی چې افغانستان ته د یاد ویروس د داخلېدو په مخنیوي کې به لازمه همکاري وکړي.
هغه همدارنګه زیاته کړې چې د چین حکومت به په ووهان ښار کې د ۶۲ افغان محصلینو روغتیا ته هم لازمه پاملرنه وکړي.
to prevent the coronavirus from entering Afghanistan, and said the Chinese side is willing to cooperate with the Afghan government on this issue. H.E. expressed concern about the 62 Afghan students in Wuhan and I assured that the Chinese side would give them necessary assistance.
— Wang Yu 王愚 (@ChinaEmbKabul) January 26, 2020
د عامې روغتیا وزرات د معلوماتو په اساس د کورونا ویروس د مخنیوي په هدف د افغانستان د څو ښارونو په هوايي ډګرونو کې په احتیاطي ډول څو روغتیايي ټېمونه په کار ګمارل شوي چې هیواد ته د راتلونکي کسان معاینه کړي.
د غه وزارت پخپلې اعلامیې کې ویلي چې تر دا مهاله په افغانستان کې د کورونا ویروس هیڅ علایم نه دي ثبت شوي.
تېره ورځ د افغانستان د بهرنیو چارو وزارت هم وویل چې له یاد ویروس څخه د مخنیوي په هدف یې په چین هیواد کې د مېشتو افغانانو د ژغورلو هڅې پيل کړي دي.
دغه وزارت په چین کې افغان سفیر ته سپارښتنه کړې وه چې په له ووهان ښار څخه د ۶۲ افغان محصلینو د ایستلو په اړه هم جدي تدابیر ونیسي.
تبه، ټوخی او نفس تنګي د دغه ویروس له علایمو څخه ګڼل کیږي.