افغان حکومت له القاعده ډلې سره د طالبانو د اړیکو د دوام په اړه د ملګرو ملتونو د امنیت شورا د ارزونې او بندیزونو د ډلې د راپور هرکلی کړی دی.
د ملګرو ملتونو د امنیت شورا د ارزونې او بندیزونو ډلې د افغانستان په فراه او غزني ولایتونو کې د القاعده شبکې د دوو قوماندانانو حسام الدین عبدالروف مشهور په ابومحسن المصري او محمد حنیف مشهور په عبدالله د وژل کېدو په استناد د روانې فبروري میاشتې پر درېیمه پخپل راپور کې ویلي چې د القاعده شبکې او طالبانو اړیکې پر ټينګې دي.
دغه ډلې پخپل راپور کې د اټکل له مخې په افغانستان کې د القاعده شبکې اړوند کسانو شمېر د ۲۰۰ او ۵۰۰ تنو تر منځ ښودلی دی.
د افغانستان د بهرنیو چارو وزارت د یکشنبې په ورځ فبرورۍ اوومه ( سلواغې ۱۹) په یوې اعلامیې کې ویلي: "د افغانستان اسلامي جمهوریت دولت د دغه راپور له یادونو څخه د هر کلي ترڅنګ، د طالبانو لخوا د ژمنو نه عملي کېدو په اړه پر خپل برحقه دریځ ټینګار کوي."
شورای امنیت سازمان ملل از ادامهٔ روابط طالبان با القاعده و گروههای تروریستی خبر داد pic.twitter.com/8fVbQiVxoK
— Ministry of Foreign Affairs - Afghanistan 🇦🇫 (@mfa_afghanistan) February 7, 2021
یاد وزارت د نړیوالې ټولنې په ګډون له ملګرو ملتونو څخه غوښتي چې طالبان او ملاتړ کوونکي یې د اوربند ټینګولو، د هدفي وژنو مخنیوي او د القاعده په ګډون له نورو ډلو سره د اړیکو پرېکولو ته وهڅوي.
د دغه وزارت په باور پر وسله والو طالبانو د نړیوالې ټولنې فشار به هغوی د تاوتریخوالي کمولو ترڅنګ، سیاسي حل او سولې ټینګېدو ته اړ کړي.
پر همدې مهال د افغانستان د اسلامي جمهوریت لومړي مرستیال امرالله صالح هم یاد راپور ته په اشارې پر خپل ټویټر لیکلي چې د القاعده شبکې او طالبانو اړیکې لاهم پر خپل ځای دي.
UN certifies and verifies that the Taliban - Al Qaeda brotherhood & terror alliance continues to be intact. Perhaps doubters may contact the UN for more details. pic.twitter.com/WXQThFJ0CE
— Amrullah Saleh (@AmrullahSaleh2) February 7, 2021
وسله والو طالبانو تر دامهاله د دغه راپور په اړه څه نه دي ویلي، خو تر دې مخکې یې ویلي وو چې په افغانستان کې د القاعده شبکې جنګیالي شتون نه لري.
د امریکا او طالبانو د دوحې تړون په اساس وسله وال طالبان باید د القاعده شبکې په ګډون له ټولو ترورستي ډلو سره اړیکې قطعه کړي.
تر دې مخکې د امریکا دفاع وزارت هم ویلي و چې وسله والو طالبانو پر خپلو ژمنو عمل نه دی کړی او ویلي و چې دغه ډله له القاعده شبکې سره لا اړیکې پالي.