د افغانستان د سولې په چارو کې د امریکا د بهرنیو چارو د وزارت ځانګړی استازی زلمی خلیلزاد وايي نړۍ له نظامي لارې څخه واک ته د رسېدو لپاره د طالبانو د هڅو په ضد اجماع لري.
په افغانستان کې د امریکا سفارت د دوشنبې په ورځ مۍ درېیمه (غوايي ۱۳) له یو شمېر افغان چارواکو سره د ښاغلي خلیلزاد له ملاقات وروسته اعلامیه خپره کړې او ویلي دي چې په دغو ملاقاتونو کې په سوله ییز ډول د افغانستان د ستونزو په حل ټېنګار شوی دی.
په اعلامیې کې راغلي دي:«هغه (خلیلزاد) تاکید کړی چې له نظامي لارې څخه واک ته د رسېدو لپاره د طالبانو د هرې هڅې په ضد سیمه ییزه او بین المللي اجماع موجوده ده.»
Special Representative for Afghan Reconciliation Ambassador Zalmay Khalilzad visited Kabul May 3 to meet with Afghan government, political, and civil society leaders to discuss America’s enduring partnership with Afghanistan... Read the full statement below. pic.twitter.com/7kE7lJEREi
— U.S. Embassy Kabul (@USEmbassyKabul) May 3, 2021
زلمي خلیلزاد په کابل کې له ولسمشر محمد اشرف غني، د سولې د عالي شورا له مشر عبدلله عبدالله او یو شمېر نورو سیاسي اشخاصو سره لیدلي دي.
په همدې حال کې د افغانستان جمهوري ریاست په خپل فیسبوک کې په اعلامیې کې له ښاغلي خلیلزاد سره د ولسمشر غني د ملاقات خبر خپور کړی دی.
په اعلامیه کې ویل شوي دي: «جمهوررئیس غني له افغانستان څخه د بین المللي ځواکونو د وتلو تر اعلان وروسته د اړیکو د نوي فصل پیل ته په پام، په نویو واقعیتونو د سولې پروسې پر عیارولو ټینګار وکړ. جمهوررئیس زیاته کړه، سوله د افغانستان خلکو او حکومت ته استعجالیت لري، خو دغه بهیر باید د افغانستان له نویو واقعیتونو سره متناسب وي.»
داسې اندېښنې شته چې له افغانستان څخه د بهرنیو ځواکونو له وتلو ورسته شاید طالبان هڅه وکړي چې له پوځي لارې څخه ځانونه واک ته ورسوي.
خو افغان چارواکي تاکید کوي چې د افغانستان دفاعي او امنیتي ځواکونه د هېواد د دفاع توان لري او د بهرنیو ځواکونو له وتلو وروسته به افغانستان د طالبانو لاس ته نه لویږي.