د خیبر پختونخوا د سوات سره تعلق لرونکي ملاله یوسفزۍ پنځه کاله وروسته پاکستان ته تللې ده.
د نوبل جایزې گټونکي ملاله یوسفزۍ د خپلې کورنۍ سره یوځاې د پنجشنبې په ورځ (مارچ ٢٩) پاکستان ته تللې ده. هغه پاکستان ته پنځه کاله وروسته سفر کوي.
ملاله یوسفزۍ چې د جینکو د تعلیم مبارزه ده، د٢٠١٢ کال د اکتوبر په میاشت کې طالبانو هغه وخت په ډزو وویشته او ژوبل یې کړه چې هغه د ښوونځي نه کور ته روانه وه.
په دغه حملې کې د زحمې کیدو نه وروسته هغه د سر د مرمۍ د لیرې کولو د عملیاتو لپاره د برتانیې برمنگهم ښار ته راوستل شوه. ملاله هغې ورځ نه وروسته په برتانیې کې ژوند کوي او هم د هغې ځاې نه خپل تعلیم او د جینکو د تعلیم لپاره نړیواله مبارزه کوي.
د پاکستان جیو ټلویژون راپور ورکوي چې پدې موخه د اسلام اباد په هوایي ډگر کې سخت امنیتي تدابیر نیول شویدي.
داسې ویل کیږي چې ملاله به د دغه څلور ورځني سفر په دوران کې د پاکستان د صدراعظم برسیره د نورو لوړپوړو چارواکو سره هم ملاقاتونه کوي.
هغه به په اسلام اباد کې په یوې غونډې کې چې د ملالې سره د خلکو د لیدو په هدف جوړه شویده، هم گډون وکړي.
د یادونې وړ ده چې تیره اونۍ د ملالې فنډ په مرسته د هغې په پلرنۍ کلي شانگلې کې د نجونو لپاره یو ښوونځی پرانستل شو.