د افغانستان د ملي امنیت شورا وايي له شپږ طالب بندیانو پرته چې نړیواله ټولنه یې له خوشې کولو سره مخالفه ده، د طالبانو ټول بندیان او افغان کومانډویان آزاد شوي دي.
دغې شورا د پنجشنبې په ورځ د سپټیمبر ۳ (وږي ۱۳) ویلي چې د شپږ طالب بندیانو د برخلیک د څرګندولو لپاره ديپلوماټیکې هڅې روانې دي.
د افغانستان د ملي امنیت شورا ویلي: "د زندانیانو د خلاصون پروسه پای ته رسېدلې، اوس باید د سولې مخامخ خبرې سمدستي پیل شي".
زموږ کمانډویان ازاد شول، دولت هم د طالبانو زندانیان ازاد کړل، یوازیني پاته زندانیان هغه کسان دي، چې په اړه یې نړیوال غبرګون موجود دی او د هغه د حل لپاره هم ډیپلوماټیکي هڅې رواني دي. د زندانیانو د خلاصون پروسه پای ته رسېدلې، اوس باید د سولې مخامخ خبرې سمدستي پیل شي.
— Office of the National Security Council (@NSCAfghan) September 3, 2020
ځینو سرچینو ویلي چې اوه طالب بندیان به په قطر کې تر نظارت لاندې وي. افغان حکومت تراوسه په رسمي ډول په دې اړه څه نه دي ویلي.
په ورته وخت کې د افغانستان د دولت د سولې مرکچي پلاوي مشر محمد معصوم ستانکزي ویلي چې له طالبانو سره د سولې خبرې به ژر پیل شي.
ښاغلي ستانکزي د پنجشنبې په ورځ د سپټیمبر ۳ (وږي ۱۳) ویلي چې مشورتي لویې جرګې د افغان دولت د سولې مرکچي پلاوي ته د مذاکراتو د ترسره کولو لپاره د لار نقشه ټاکلې ده.
قطعنامه جرگه مشورتی اخیر صلح در حقیقت نقشه راه برای مذاکرات مستقیم صلح بر اساس منافع ملی کشور است. هیات مذاکره کننده جمهوری اسلامی افغانستان به نمایندگی از ملت و دولت مذاکرات صلح را به هدف یک افغانستان مترقی، آزاد و متحد که در آن حقوق همه اتباع حفظ باشد، به زودی آغاز خواهد کرد.
— Mohammad Masoom Stanekzai (@MMStanekzai) September 3, 2020
ټاکل شوې وه چې د افغانستان د دولت د سولې مرکچي پلاوی د چهارشنبې په ورځ دوحې ته سفر وکړي، خو د ناڅرګندو لاملونو په سبب دا سفر وځنډول شو.
د سولې په چارو کې د افغانستان د دولت وزارت یوې سرچینې امریکا غږ ته وویل ښايي دغه پلاوی نن د پنجشنبې په ورځ دوحې ته سفر وکړي.