د عبدالله عبدالله په مشرۍ د ثبات او همپالنې انتخاباتي ډلې د محمداشرف غني په رهبرۍ د دولت جوړوونکي له انتخاباتي ډلې سره د مذاکراتو د پیلېدو خبر وکړی، خو ارګ وايي چې تر اوسه هیڅ مذاکرات نه دي شوي.
د عبدالله عبدالله د انتخاباتي ډلې لومړي مرستیال عنایتالله بابر فرهمند ویلي، چې دواړو خواو دا مذاکرات د افغانستان د سولې لپاره د امریکا د ځانګړي استازي زلمي خلیلزاد په منځګړیتوب پیل کړي دي.
هغه په خپل ټویټر کې لیکلي: "د لوړې د مراسمو ځنډول او د والیانو د ګومارلو لړۍ ودرول ومنل شو. سوله د ثبات او همپالنې د انتخاباتي برنامې یو لومړیتوب وو / دی، خو د ملت د پاکو رایو څخه د دفاع لپاره د کرښې تر پایه ولاړ او ژمن یو".
مذاکرات دوتیم انتخاباتی با پادرمیانی نماینده ویژه ایالات متحده امریکا در آستانه امضای توافقنامه صلح آغاز گردید. تعویق تحلیف و توقف تعیین والیها پذیرفته شد. صلح یکی از اولویتهای برنامه انتخاباتی ثبات و همگرایی بود/است، اما برای دفاع از آرای پاک ملت تا آخر خط پابند و متعهد هستیم.
— Dr Enayatullah Babur Farahmand (@dr_enayatullah) February 26, 2020
ارګ د ښاغلي فرهمند دا څرګندونې رد کړي دي.
د جمهوري ریاست ویاند صدیق صدیقي په خپل ټویټر لیکلي، چې له هیڅ سیاسي لوري سره مذاکرات نه دي شوي.
خو ښاغلي صدیقي ویلي، چې جمهور رئيس غني تصمیم لري ترڅو د راتلونکې کابینې جوړولو لپاره له مختلفو سیاسي قشرونو او د خلکو له استازو سره مشورې وکړي.
تا حال هیچگونه مذاکرهی با کدام طرف سیاسی صورت نگرفته است. رئیس جمهور غنی مصمم است تا برای تشکیل کابینه آینده با اقشار مختلف سیاسی و نمایندگان مردم مشوره کند.
— Sediq Sediqqi (@SediqSediqqi) February 27, 2020
د اشرف غني په مشرۍ دولت جوړونکی انتخاباتي ټکټ هم د ښاغلي فرهمند څرګندونې ګونګوسې ګڼلي او ویلي یې دي، چې د ثبات او همپالنۍ ډله دې له داسې څرګندونو ډډه وکړي، چې عامه ذهنیت مغشوشوي او د انتخاباتو پروسه تر پوښتنې لاندې روالي.
د دغه ټکټ یو غړي خالد سادات امریکا غږ ته وویل، چې د جمهور رئيس غني او ښاغلي خلیلزاد ترمنځ لیدنو کې ټول تمرکز د سولې پر خبرو دی او د ګډ حکومت د جوړولو بحث هیڅ مطرح شوی نه دی.
هغه زیاته کړه: "د ښاغلي خلیلزاد او د افغانستان د مقاماتو له لوري په هیڅ صورت د ګډ حکومت او د دې حکومت چې اوس یې لرو د اجرائیه ریاست په شتون کې د دوام لپاره هوکړه نه ده شوې او نه داسې څه مطرح شوي... په ټوله کې د ولسمشر اشرف غني او امریکايي مقاماتو خبرې په ډپلوماټیک چوکاټ کې له طالبانو سره د سولې د خبرو اترو په لړۍ باندې څرخېږي".
ښاغلي سادات دغه راز وویل، چې د جمهور رئيس غني د لوړې مراسم له طالبانو سره د سولې د خبرو د روښانه کېدو لپاره ځنډول شوي دي: "ممکن یو لړ مسلې د طالبانو له خوا هم مطرح شي، تر څو هغه باندې هم غور او فکر وشي، له هغې ورهاخوا په هیڅ صورت بایلونکی ټیم د حکومت شریک نه دی".
ټاکل شوې وه چې د جمهور رئيس غني د لوړې مراسم د پنجشنبې په ورځ د فبروري په ۲۷مه (کب اتمه) ترسره شي، خو د امریکا په غوښتنه افغان حکومت دا نېټه د مارچ نهمې ته وځنډوله.
د افغاسنتان د سولې لپاره د امریکا ځانګړي استازي زلمي خلیلزاد تېره ورځ وویل، چې د انتخاباتو د بهیر له پای ته رسېدو سره جمهور رئيس غني د دغو انتخاباتو ګټونکی اعلان شوی او نور مشران باید ډاډ ترلاسه کړي، چې نوی حکومت ټولشموله او د ټولو افغانانو د ارمانانو انعکاسوونکی دی.