د کاناډا حکومت د کډوالۍ، پناه او تابعیت ورکولو چارو ادارې یا (IRCC) هغه هیواد ته یو ځل بیا له پاکستان څخه د سلګونو افغان کډوالو د انتقال خبر ورکړ.
دې ادارې تېره شپه نومبر دوهمه (لړم ۱۱) پر خپل ټویټر پاڼه لیکلي چې تېره ورځ ۳۳۵ نوي افغان کډوال په ځانګړي پرواز کې له پاکستان څخه د دغه هیواد «ساسکاټون» سیمې ته انتقال شول.
د کاناډا حکومت د کډوالۍ، پناه او تابعیت ورکولو چارو ادارې ویلي: "دوی به د کاناډا په ۱۸ بېلابېلو ټولنو کې چې له هغه جملې څخه موس فک،پرنس البرت،رجینا او ټورنټو کې ځای پر ځای شي."
Today, 335 new Afghan refugees from Pakistan landed in Saskatoon. They will settle in 18 different communities across Canada including Moose Jaw, Prince Albert, Regina and Toronto. Find out how to #WelcomeAfghans in your community: https://t.co/T8iXSWK2Nx pic.twitter.com/3NTqbCjaiW
— IRCC (@CitImmCanada) November 2, 2022
د کاناډايي چارواکو په وینا په یادو کسانو کې د افغان ترجمانانو د کورنیو د غړو ترڅنګ هغه کسان هم شامل و چې په افغانستان کې د کاناډا ماموریت پر مهال له دوی سره کار کړی و.
د کاناډا د مهاجرت، پناه ورکونکې او تابعیت ادارې د تېرې پنجشنبې په ورځ اکتوبر۲۷ ( لړم پنځم) هم له پاکستان او تاجیکستان څخه هغه هیواد ته د ۶۶۸ نورو افغان کډوالو د انتقال خبر ورکړی و.
د یادې ادارې د معلوماتو له مخې یاد افغان کډوال به له هغو ۲۱۳۰۵ افغان کډوالو سره يو ځای شي چې د ۲۰۲۱ کال تر اګست میاشتې وروسته دغه هیواد ته رسېدلي دي.
د کاناډا حکومت پخپله خاوره کې شاوخوا ۴۰زره افغان کډوالو ته د ځای ورکولو ژمنه کړې ده.
د کاناډا حکومت د دغې پرېکړې په اساس ټاکل شوې د ترجمانانو او د هغوی د کورنیو په ګډون ۵ زره کسان د کډوالۍ ځانګړي پروګرام او څه باندې ۱۸زره نور له ګواښ سره مخ افغانان د بشردوستانه پروګرام له لارې هغه هیواد ته انتقال کړي.
د کاناډا د کډوالۍ ادارې یو ځل بیا ټینګار کړی دی چې دغه هیواد د نورو افغان کډوالو چې له دوی سره یې په افغانستان کې کار کړی دی هغه هیواد ته د انتقال بهیر ارزوي.
د کاناډا د کډوالو، پناه ورکوونکو ادارې هم ویلي چې دغه هیواد ته تازه تللي کډوال به د کاري قوي زیاتوالي په برخه کې مرسته وکړي او تر کرونا ویروس وروسته به د دغه هیواد په اقتصادي وده کې هم مهم رول ولري.
د تیر کال د اګست میاشتې له ۱۵ څخه تر ۳۰ مې نېټې لږ تر لږه ۱۲۴ زره کسان له افغانستان څخه و ایستل شول،خو اوس مهال دغه بهیر پڅ شوی دی او په زرګونو په شرایطو برابر کسان د وتلو په تمه دي.