د افغانستان د عامې روغتیا وزارت وايي، په تیرو ۲۴ ساعتونو کې په هیواد کې د کرونا ویروس ۴۴ نورې مثبتې پېښې ثبت شوي دي.
روغتیا وزارت نن یکشنبه اکتوبر۴ (تلې ۱۳) ویلي چې په تیرو ۲۴ ساعتونو کې د کرونا ویروس د ۳۵۷ مشکوکو سمپلونو معاینات شوي چې ۴۴ یې مثبت ثابت شوي دي.
په دې سره په دې هیواد کې د کروناویروس د ټولو مثبتو پېښو شمېر ۳۹۳۴۱ ته پورته شو.
د رسمي شمېرو له مخې تر دا مهاله په افغانستان کې د کرونا ویروس له امله ۱۴۶۲ تنه مړه شوي دي.
د افغانستان د روغتیا وزارت د معلوماتو له مخې د نن یکشنبې تر ورځې پورې په افغانستان کې ۳۲۸۵۲ تنه بیرته له دې ناروغۍ څخه روغ شوي دي.
کرونا ویروس د لومړي ځل لپاره د ۲۰۱۹ کال په ډسمبر میاشت کې د چین د هوبي ایالت په ووهان ښار کې پیدا شو په چټکه په وبا واوښت او په ټولې نړۍ کې خپور شو.
د امریکا د جانس هاپګینز پوهنتون د معلوماتو په اساس تر دا مهاله په نړۍ کې څه باندې ۳۴ میلیون کسان په کرونا ویروس اخته شوي او څه باندې یو میلیون نور ورڅخه مړه شوي دي.