افغان چارواکي وايي په دغه هیواد کې د کرونا ویروس ضد واکسین د پیل څخه بیا تر دا مهاله ۱۹۶۱۷ امنیتي منسوبین واکسین شوي دي.
د یادو کسانو له ډلې ۱۰۹۵۰ تنه یې د ملي اردو سرتیري او ۸۶۶۷ نور یې افغان ملي پولیس دي.
د افغانستان د دفاع وزارت د ویاند مرستیال فواد امان نن یکشنبه مارچ ۱۴(کب ۲۴) امریکا غږ ته وویل چې په کابل او ولایتونو کې د ملي اردو سرتیرو ته د کرونا واکسین لګولو بهیر په چټکۍ سره روان دی.
نوموړي زیاته کړه: "د افغانستان د دفاع وزارت ټول منسوبین د پلان پر اساس د کرونا ویروس ضد واکسین کیږي."
پر همدې مهال د افغانستان د کورنیو چارو وزارت د پلان او ستراتیژۍ معین صدیق صدیقي وايي چې تر دامهاله په زرګونو پولیسو ته د کرونا ویروس ضد واکسین ورکول شوی دی.
په افغانستان کې د کرونا ویروس ضد واکسین د تطبیق بهیر د روانې کب میاشتې پر پنځمه نېټه پيل شو.
د کرونا واکسین ۵۰۰زره ډوزه د هند لخوا افغانستان ته ورکړل شول چې د چارواکو په وینا ټاکل شوې ۲۵۰زره کسانو ته ورکړل شي.
بلخوا د افغانستان د روغتیا وزارت ویلي چې تر دا مهاله ۴۱۷۶۷ روغتیايي کار کوونکي ،د رسنیو کارکونکو او ښوونکو ته د کرونا ویروس ضد واکسین تطبیق شوی دی.
د افغانستان د روغتیا وزارت د وروستیو معلوماتو په اساس تر دا مهاله په دغه هیواد کې د کرونا ویروس ۵۵۹۵۵ مثبتې پېښې ثبت شوي او ۲۴۵۷ تنه نور ناروغان ورڅخه مړه شوي دي.
کرونا ویروس د لومړي ځل لپاره د ۲۰۱۹ کال په ډسمبر میاشت کې د چین د هوبي ایالت په ووهان ښار کې پیدا شو.
د امریکا د جانس هاپګینز پوهنتون د معلوماتو په اساس تر دا مهاله په نړۍ کې ۱۱۹ میلیونه ۴۸۸زره کسان په کرونا اخته شوي اوڅه باندې دوه میلیونه کسان ورڅخه مړه شوي دي.