ولسمشر محمد اشرف غني د کابينې له يو شمېر وزيرانو سره يو ځای د بيارغونې د يو شمېر پروژو د پرانستنې او د خلکو له استازو سره د ليدنې په موخه دوشنبه (اپریل۹) د خوست ولايت ته ولاړ.
ښاغلي غني خوست ته په رسيدو سره لومړی په اسماعيل خېلو او مندوزيو ولسوالۍ کې ملکي هوايي ډګر ته لاړ او هلته يې د دغه هوايي ډګر لپاره د رنوې کرښه پرانېسته او همدا ډول يې ددغه هوايي ډګر د رادار لپاره د ودانۍ او د داخلي سړکونو د کار د پيل پرانستنه هم وکړه.
له دې وروسته په هليکوپتر کې په دغه ولسوالۍ کې د برېښنا سب سټېشن ته لاړ او هلته يې د برېښنا د وېش چارو پروژه رسماً پرانیستله، چې په ترڅ کې به يې ۱۳ زره کورنۍ له دايمې برېښنا برخمنې شي.
د خوست د ولايت مقام وياند طالب منګل د يادو پرژو د پرانستنې پرمهال خبريالانو ته وويل، چې پر تکميل شويو پروژو ۱۰۰۷ ميليونه افغانۍ لګښت شوی او د تازه پيل شويو پروژو لپاره ۱۰۱۸ ميليونه افغانۍ بېلې شوې دي.
ټاکل شوې چې ولسمشر محمداشرف غني به نن د ورځې تر پایه له قومي مشرانو، د ولايتي شورا غړو، مدني فعالانو او ځوانانو سره پر ځانګړو ناستو سربېره نن ماسپېښين په خوست ښار کې يوې ولسي غونډې ته وينا هم وکړي.