روسیه او پاکستان په افغانستان کې د داعش له حضور څخه اندېښنه لري.
د روسیې د بهرنیو چارو وزیر سرګي لاوروف په مسکو کې له خپل پاکستاني سیال خواجه آصف سره په لیدنې کې په افغانستان کې د ترهګرۍ د خطر په له منځه وړلو کې د ناټو په مشرۍ د ائتلاف پوځیانو پر هڅو جدي "شک" ښودلی دی.
سرګي لاوروف وایې چې له مسکو او اسلام آباد سره شته اسناد ښیي چې د افغانستان په ختیځ او شمال کې زرګونه داعش جنګیالي فعالیت کوي.
لاوروف وویل چې "د داعش د نفوذ له زیاتېدو څخه اندېښنه" لري.
روسي ديپلومات وویل چې د داعش فعالیتونه "مرکزي آسیا ته او له هغه ځایه روسیې ته د ترهګرو د نفوذ کولو خطر زیاتوي."
د پاکستان د بهرنیو چارو وزیر خواجه آصف د روسیې د اندېښنو په تائید وویل چې په افغانستان کې داعش جنګیالي "له کنټرول پرته" په زیاتېدو دي.
خواجه آصف ويلي کابل او واشنګټن په افغانستان کې د داعش پراخ حضور نه تائیدوي.
د خواجه آصف په باور داعش جنګیالي "د مرکزي آسیا، پاکستان، چین او بلاخره د فدراتیفې روسیې لپاره خطر دي."
داعش وسله والو او طالب جنګیالیو د کابل پر انټرکانټیننټال هوټل د برید په شمول په وروستیو اوونیو کې په افغانستان کې ګڼ بریدونه کړي دي.
د افغانستان حکومت او امریکا په پاکستان کې میشتې ترهګرې ډلې د افغانستان او سیمې په ناامنه کولو تورنوي.
د داعش فعالیتونو ته په کتو، روسیه او پاکستان د پوځي همکاریو د یو ګډ کمېسیون پر جوړولو موافقه کړې ده. ددغه کمیسیون کار په سیمې کې د داعش لخوا د شته ګواښونو له منځه وړل ښودل شوي دي.
له پاکستان سره د امریکا د اړیکو له ترینګلي کېدو وروسته، اسلام آباد، روسیې او چین ته مخه کړې ده.
د جنورۍ په میاشت کې د امریکا ولسمشر ډونالډ ټرمپ پر پاکستان خپلې پوځي مرستې بندې کړې ویې ویل چې اسلام آباد د افغان طالبانو او حقاني شبکې په شمول د ترهګرو ډلو پر ضد جدی اقدام نه کوي.
Your browser doesn’t support HTML5
روسیه او پاکستان افغانستان کې د 'داعش پر فعالیت اندېښمن' دي