د پښتون ژغورنې تحریک یوه فعاله غړي ثنا اعجاز د پاکستان دولتي ټلویژن د دندې گوښه کړیده او علت یې ورته دا ښودلی چې د چارواکو امر دی.
په پاکستان کې د پښتون ژغورنې تحریک د غړیو په ضد اقدامات دوام لري او وروستۍ قرباني یې ثنا اعجاز ده.
ثنا اعجاز امریکاغږ ته وویل چې د یوې میاشتې راهیسې ورته کار نه ورکول کیده او نن یعني د چارشنبې په ورځ هغې ته په کار کې وویل شول چې نوره دې نه راځي.
ثنا اعجاز وایي "ما ورنه پوښتنه وکړه چې اخیر ولې ما د کاره لیرې کوي، نو راته یې وویل چې ته د پښتون ژغورنې تحریک سره فعالیتونه کوی، ځکه مونږ ته د بره نه امر شویدی بې وسه دي، څه نشي کولی."
ثنا اعجاز د دندې نه د گوښه کیدو خبر په خپل ټویټر هم شریک کړ. هغې لیکلي
The management told me that they have terminated my services due to my association with the PTM, she said, adding that they were helpless as these orders “had come from above”. https://t.co/VH75ZObSVK
— Sanna Ejaz(سیاله) (@sanaejaz2) May 9, 2018
"چارواکو راته وویل چې هغوي د پښتون ژغورنې تحریک سره زما د طرفدارۍ له کبله ما د کاره لیرې کوي. هغې ماته دا هم وویل چې بی وسه ده، د بره نه امر شویدی."
ثنا اعجاز د دوو کلونو راهیسې د پاکستان ټیلویژن د پیښور څانگې سره کار کاوه. هغه وایي چې دا لمړنې ځل ندی چې د خپلو حقونو د غوښتلو په بدل کې ورسره دا ډول چلند کیږي.
ثنا وایي چې د دې نه مخکې یې هم ډیر څه بایللي دي او اوس هم دیته تیاره ده چې د پښتون ژغورنې تحریک سره خپل فعالیتونو ته د پخوا پشان دوام ورکړي.
د بنو پوهنتون په منظور پښتین بندیز
له بلې خو د بنو پوهنتون یوه اعلامیه خپره کړیده چې په پوهنتون کې یې د منظور پښتین په راتگ بندیز لگولی دی. په دی برسیره په دغه اعلامیې کې د منظور پښتین سمبولک خولۍ په سرولو هم بندیز لگول شویدی.
د منظور په خولۍ په ځینو نورو سیمو د مثال په توگه سوات او دیر کې هم بندیزونه لگول شویدي.
د تحریک د غړیو په ضد دا اقدامات په داسې وخت کې کیږي چې منظور پښتین د نورو ملگرو سره کراچۍ ته تللی دی او هلته د یوې لوی احتجاجي غونډې تیاری کوي.
د کراچۍ غونډه به د شنبې په ورځ یعني د می په ١٣ وشي.