د داعش ډله ادعا کوي چې د کابل ښار په شپږمه حوزې کې د تذکرو د ویش پر مرکز ځانمرګی برید دوی کړی. په برید کې ۵۷ تنه وژل شوي او ۱۱۹ نور ټپيان شوي.
د داعش ډلې ته منسوب د اعماق په ویبسایټ کې دا ادعا خپره شوې ده.
د افغانستان د کورنیو چارو وزارت ویاند نجیب دانش امریکا غږ آشنا ته وویل، دغه برید د یو پلي ځانمرګي بریدګر له خوا د کابل ښار په شپږمه امنیتي حوزه کې شوی دی.
هغه وویل "د شپږمې حوزې اړوند د آصف مایل په کوڅه کې د تذکرو د ویش په مرکز کې برید شوی".
د افغانستان د عامې روغتیا وزارت د بهرنیو اړیکو رئیس وحید مجروح امریکا غږ اشنا ته وویل، چې د پیښې له ځای څخه د ۵۷ کسانو مړي او ۱۱۹ ټپيان روغتونونو ته لیږدول شوي دي.
د کورنیو چارو وزارت ویاند نجیب دانش وویل، چې د پیښې ټول قُربانیان ملکي وګړي دي.
د افغانستان ولسمشر محمد اشرف دغه برید غندلی او ویلي یې دي، چې دا ډول بریدونه به په ډیموکراټیکو بهیرونو کې د ګډون لپاره د خلکو عزم او اراده کمزورې نه کړي.
د تذکرو د ویش پر دغه مرکز په داسې حال کې برید شوی، چې له یوې اونۍ راهیسې په افغانستان کې د ټاکنو لپاره د رایې ورکوونکو د نوم ليکنې پروسه پیل شوې ده.
د رایې ورکوونکو نوم لیکنه د تذکرو له مخې کیږي، چې له امله یې د تذکرو د ویش مرکزونو ته د خلکو تګ راتګ زیات شوی دی.
له دې وړاندې وسلهوالو طالبانو خلکو ته خبرداری ورکړی وو، چې په ټاکنو کې ګډون و نه کړي.