طالب چارواکو د چهار شنبې په ورځ فبروري ۲۲ (کب دریمه) له واشنګټن څخه وغوښتل چې د افغانستان بانک ۳.۵ میلیارده ډالره شتمني ستنه کړي.
طالبانو وروسته له هغه له متحدو ایالتونو دا غوښتنه وکړه چې د نیویارک د منهټن یو قاضي جورج ډانیلز د سه شنبې په ورځ فبروري ۲۱ پریکړه وکړه چې د سپټمبر د ۱۱ د قربانیانو عزیزان نشي کولی د افغانستان د کنګل شویو پيسو نیمایي برخه ترلاسه کړي.
د طالبانو د حکومت د ویاند مرستیال بلال کریمي د فرانسې خبري آژانس ته وویل:" دا شتمنۍ د افغانستان پورې اړه لري.د کنګل کیدو او د افغانستان د خلکو لپاره یې د بیرته ستنیدو په برخه کې باید هیڅ دلیل نه وي."
کریمي زیاته کړه، هغوی (امریکا) باید بې له قید او شرط څخه د افغانستان شتمني ستنه کړي.
متحدو ایالتونو وروسته له هغه د افغانستان د میلیاردونو ډالرو کنټرول واخیست چې طالبان د ۲۰۲۱ کال په اګست میاشت کې یووار بیا پر افغانستان واکمن شول او ولسمشر بایډن وویل کیدای شي د افغانستان د کنګل شوې شتمنۍ نیمایي برخه د سپټمبر د ۱۱ د قربانیانو کورنیو ته ځانګړې شي.
د متحدو ایالتونو د نیویارک ایالت د منهټن د یوې محکمې قاضي جورج ډانیلز وویل د "اساسي قانون د محدودیت" له مخې یې ونشوای کولی چې طالبان د افغانستان مشروع حکومت وګڼي او دا شتمني د افغانستان بانک پورې اړه لري.
دانیلز زیاته کړه، قربانیانو ته ددغې شتمنۍ د اخیستلو اجازه د داسې حکم په معني ده چې طالبان د افغانستان قانوني حکومت دی.
نوموړي وویل د امریکا محاکم دا قدرت نلري چې دې پایلې ته ورسیږي، هغه زیاته کړه د بایډن حکومت هم طالبان د افغانستان د حکومت په توګه په رسمیت نه پيژني.
دغه امریکایي قاضي لیکلي: "مدعیان حق لري چې د غیابي حکم پر اساس زموږ د هیواد د تاریخ د تر ټولو ناوړه تروریستي برید بشپړه خساره ترلاسه کړي خو هغوی نشي کولی د افغانستان بانک شتمنۍ ترلاسه کړي."
دغه امریکایي قاضي وویل، د سپتمبر د ۱۱ د بریدونو خساره باید طالبان ورکړي نه د افغانستان پخوانی اسلامي جمهوري دولت او یا هم افغانان.
د امریکایي قاضي دا پریکړه هغو څلورو مدعي ډلو ته ماته ده چې د افغانستان بانک د اوو میلیارده ډالرو کنګل شویو پیسو د یوې برخې د غوښتلو ادعا یې کړې ده.
د څلورو مدعي ډلو څخه د یوې ډلې یو مدافع وکیل لي ولوسکای وویل:" دا پریکړه د سپټمبر د ۱۱ څه باندې لس زره متضررین له دې څخه بې برخې کوي چې له طالبانو څخه د خپل غرامت حق ترلاسه کړي."
نوموړي زیاته کړه، هغوی په دې باور دي چې دا تصمیم په غلطۍ نیول شوی او په وړاندې به یې استناف وغواړي.