د طالبانو د بهرنیو چارو وزارت وايي، اقتصادي ستونزې له تیر حکومت څخه د دوی حکومت ته په میراث پاتې دي.
د طالبانو د بهرنیو چارو وزارت ویاند عبدالقهار بلخي دغه څرګندونې د افغانستان د بیا پخلاینې په چارو کې د امریکا د بهرنیو چارو وزارت د ځانګړي استازي ټامس وست هغو څرګندونو ته په ځواب کې کړي چې ویلي و د اګست تر نیمايي مخکې هم افغانستان له اقتصادي ستونزو سره مخ و.
ښاغلي بلخي نن شنبه نومبر ۲۰ (لړم ۲۹) پر خپل ټویټر پاڼه لیکلي چې د ستونزو د حل لپاره باید هر څوک خپل مسؤلیت ادا کړي.
د امريکا خاص استازي، ښاغلی ټام ويسټ، دا څرګندوني چې افغانستان د تېرې اګست میاشتې وړاندې هم له سخت بشري ناورین سره مخ و په حقیقت بنا اعتراف دی. رښتیا هم اقتصادي ستونزي نوي حکومت ته په ميراث پاته شوي دي.نو ښه به وي چي د ستونزو د حل لپاره هرڅوک خپل مسئولیت اداکړي. pic.twitter.com/0jiNxKsIfN
— Abdul Qahar Balkhi (@QaharBalkhi) November 20, 2021
طالبانو د تیرې چهارشنبې په ورځ د متحده ایالاتو کانګرس ته په یو پرانیستې لیک کې د افغانستان د مرکزي بانک د کنګل شویو شتمنیو د خلاصید غوښتنه وکړله.
واشنګټن د افغانستان د مرکزي بانک تقریباً ۹.۵ میلیارد ډالره شتمني وروسته تر هغه کنګل کړله چې طالبانو په افغانستان کې واک تر لاسه کړ.
د طالبانو حکومت څو میاشتې کیږي چې مامورینو ته یې تنخواګانې ندي ورکړي او د مالیې وزارت هم د وارداتو لپاره پیسې نلري.
خو د افغانستان لپاره د امریکا ځانګړي استازي تامس ویسټ تیره شپه پر خپل ټویټر پاڼه ولیکل چې واشنګټن د مخکې نه طالبانو ته واضح کړي وه که په افغانستان د مخکني حکومت سره د خبرو پر ځای د زور د لارې واک تر لاسه کړي، غیرې بشري مرستې به پرې بندې شي .
د امریکا ځانګړي استازي په اعلامیې کې همدارنګه ویلي چې په افغانستان کې د طالبانو د راتګ نه وړاندې هم د کالونو وچکالۍ او کویډ-۱۹ بیمارۍ له کبله اقتصادي او بشري ستونزې وې او زیاته یې کړ چې امریکا به د افغانستان د ولس سره خپلې مرستې روانې ساتې.