د افغان مېرمنو په چارو کې د امریکا متحده ایالاتو ځانګړې استازې رینا امیري وايي، که طالبان نړیوال مشروعیت غواړي باید د افغانانو بشري حقونو ته درناوی وکړي.
دا په داسې حال کيده چې په افغانستان کې د ملګرو ملتونو سیاسي استازولۍ یا (يوناما) ویلي چې تیره ورځ یې په کابل کې د دوو نورو ښځینه فعالانو د نیول کېدو د راپورونو په اړه د طالبانو د کورنیو چارو له وزارت څخه معلومات غوښتي دي.
یوناما ویلي چې ملګري ملتونه یو ځل بیا د ټولو «بې درکه» شوو ښځینه فعالانو او د هغوی د دوستانو د خوشي کېدو غوښتنه کوي.
د افغان مېرمنو لپاره د امریکا متحده ایالاتو ځانګړي استازي رینا امیري نن جمعه فبرورۍ څلورمه( سلواغې ۱۵) د یوناما اندېښنې ته په کتوپر خپل ټویټر پاڼه لیکلي: "دا غیر عادلانه توقیفونه باید ودرول شي. که طالبان له افغان ولس او نړۍ څخه مشروعیت غواړي، نو دوی باید د افغانانو بشري حقونو ته درناوی وکړي. په ځانګړې توګه د ښځو لپاره او د بیان د ازادۍ لپاره."
نوموړې زیاته کړې چې طالبان باید دغه ښځینه فعالانې او خپلوان باید ژر تر ژره خوشي کړي.
These unjust detentions must stop. If the Taliban seek legitimacy from the Afghan people & the world, they must respect Afghans’ human rights - especially for women - including the freedom of expression & immediately release these women, their relatives & other activists. https://t.co/LMrOnPkxvT
— U.S. Special Envoy Rina Amiri (@SE_AfghanWGH) February 4, 2022
پر همدې مهال د بخښنې نړیوال سازمان د جنوبي اسیا څانګې د افغان ښځینه فعالانو لادرکه کېدو ته په غبرګون کې ویلي چې طالبان باید د افغان ښځینه فعالانو په وړاندې د «خپلو غیر قانوني» سرتیرو کارول پای ته ورسوي.
د طالبانو حکومت تر دا مهاله په کابل کې د تازه لادرکه شوو ښځینه فعالانو د راپورونو په اړه څه نه دي ویلي.
خو تر دې مخکې د وو تنو نورو ښځینه فعالانو تمنا زریاب پریاني او پروانه ابراهیم خېل د نیول کېدو په اړه راپورونه رد کړي دي.
بلخوا د افغان خبریالانو د خوندیتوب کمېټې ویلي چې د عبدالقیوم زاهد صمدزي په نوم یو افغان خبریال د تیرې سې شنبې په ورځ د طالبانو اړوند کسانو لخوا وهل شوی او تر څو ساعتونو بند وروسته یې بیرته په خوشي کړی دی.
د خبریالانو د ساتنې کمیټې د پنجشنبې په ورځ فبروري دریمه (سلواغې ۱۴) وویل طالبان باید ډیر ژر د افغان خبریال عبدالقیوم زاهد صمدزي د نیولو او هغه سره د ناوړه چلند په اړه څیړنې او له مسولو کسانو سره حساب کتاب وکړي.
په کابل کې د طالبانو حکومت تر دا مهاله په دې اړه څه نه دي ویلي.