نن جمعه تر غرمې مخکې فبروري ۷مه(سلواغې۱۸مه) د ښار د لسمې امنیتي حوزې اړوند د خواجک بابا په سيمه کي دوه تنه د ناپيژانده وسله والو په بريد کې وژل شوي دي.
په ړوژل شويو کسانو کې يو تن د هلمند په پوليسو او بل تن د ملي امنيت له ادارې سره کار کاوه.
د کندهار د پوليسو وياند جمال بارکزي د پېښې په اړه امریکاغږ اشنا ته وويل چې پوليسو د بريد د عاملينو د نيول کيدو هڅي پيل کړي.
تېره چهارشنبه د ښار په مرکزي برخه کې يوه ښځينه پوليسه هم په غلچکي بريد کې وژل شوې وه.
په کندهار کې د غلچکي بريدونو له زيات والي څخه د دې ښار اوسيدونکي په اندېښنه کې دي.
دغه راز په تيره يوه مياشت د هوايي ځواک د يوه پيلوټ په ګډون ۱۵ تنه نور په کندهار ښار کې د غلچکي بريدونو په ترځ کې وژل شوي.
بلي خوا ته نن غرمه د شاه وليکوټ ولسوالی د هلې بند د امنيتي کمر بند مسؤل څارن محب الله هم د ماين په چاودنه کې وژل شوی دی.
د هلې بند د کجکي وروسته په جنوب کې د اوبو ستر بند دی چي د امنيت ساتلو لپاره يې پوليس په سيمه کې امنيتي کمربند لري.
د شاه وليکوټ امنيه قومندان سمونوال پاچا خان امریکا غږ ته وويل چې د څارمن محب الله د سپرلی موټر د هلې په بند کي د سړک د غاړي پر ماين ختلی هغه وژل شوی او يو ساتونکی يې ټپي شوی.
د هلې بند په کندهار د تفريح له عمده سيمو څخه هم ګڼل کيږي چي هره جمعه سل ګونه کسان د تفريح لپاره ورځي.
تر اوسه د دغه پېښو مسؤلیت کومې وسله والې ډلې نه دی منلی.