د پکتيا ولايت په احمدخېلو ولسوالۍ کې د رايې ورکوونکو د نوم ليکنې مرکز د موقعيت د انتخاب پرسر د دوو قبيلو ترمنځ وسله واله شخړه کې دوه کسان وژل شوي او يو بل ټپي شوی دی.
د پکتيا د والي وياند عبدالله حسرت امريکاغږ ته وويل، چې شخړه د ماماخېل او بادين خېل قبېلو ترمنځ پرون مازديګر مهال شاوخوا شپږ بجې د احمدخېلو ولسوالۍ د سټو په سيمه کې شوې ده.
نوموړي زياته کړه، چې په وژلو شويو کې يوه ښځه او يو سړی دي.
عبدالله حسرت دغه راز وويل، چې د پېښې عاملين تر اوسه نه دي نيول شوي او د پېښې د لا روښانتيا په خاطر يو درې کسيز پلاوی سيمې ته رسيدلی دی.
په ورته وخت کې د پکتيا د ټاکنو ولايتي دفتر د عامه پوهاوي مسوول شېرعلي فيضي هم له امريکاغږ سره په خبرو کې ياده شوې پېښه تاييد کړه او ويې ويل چې د نوم ليکنې له مرکز د باندې شوې ده.
د يادونې وړ ده، چې دا پېښه په خپل ډول کې کم سارې پېښه بلل کېږي، چې د رايې ورکوونکو د نوم ليکنې د مرکز پرسر د قبيلو ترمنځه وسله واله شخړه رامنځته کېږي.
خوست کې رایې اچونې پر مرکز برید شوی
د خوست د والي وياند طالب منګل وايي، چې د دغه ولايت په مندوزيو ولسوالۍ کې د رايې ورکوونکو د نوم ليکنې پر يوه مرکز وسله وال بريد کې يو پوليس او يو د ملي اردو سرتېری وژل شوي دي.
طالب منګل امريکاغږ ته وويل، دغه بريد چې نن سهار شاوخوا ۱۰ بجې د مندوزيو ولسوالۍ د سالم کلي د نوم ليکنې پر مرکز شوی، دريو کسانو ترسره کړی، چادرۍ يې اغوستې وې او په يوه سراچه موټر کې راغلي او تر بريد وروسته له سيمې وتلي دي.
تر اوسه د دې بريد مسووليت چا پرغاړه نه دی اخيستی.