د امریکا متحده ایالاتو گواښ کړی چې که ترکیه پر سوري کردانو خپلو بریدونو ته دوام ورکړي واشنگټن به د ترکیې اقتصاد وځپي.
د امریکا د متحده ایالاتو جمهور رئیس ډونالډ ټرمپ په سوریه کې د داعش د ماتې او له هغه هیواد نه د امریکایي پوځیانو د وتلو په اړه په ټویټر کې لیکلي چې په سوریه کې بیا د داعش د راټوکیدو په صورت کې به امریکایي ځواکونه له مختلفو لورو او د شاوخوا اډو څخه پر دغې ډلې بریدونه وکړي.
ښاغلي ټرمپ همداشان پدې ټویټ کې د سوریې پر کردانو چې امریکا یې ملاتړ کوي د ترکي پوځیانو بریدونو ته په اشارې خبرداری ورکړی چې "که ترکیه پر کردانو حمله وکړي، د ترکیې اقتصاد به ویجاړ کړي".
Starting the long overdue pullout from Syria while hitting the little remaining ISIS territorial caliphate hard, and from many directions. Will attack again from existing nearby base if it reforms. Will devastate Turkey economically if they hit Kurds. Create 20 mile safe zone....
— Donald J. Trump (@realDonaldTrump) January 13, 2019
ښاغلي ټرمپ په یو بل ټویټ کې له کردانو هم غوښتي چې د ترکیې پر ضد د لمسونکو اقداماتو ډډه وکړي.
د ښاغلي ټرمپ خبرداري د ترکي مقاماتو غبرگونونه راپارولي دي.
د ترکیې د جمهوري ریاست ویاند ابراهیم کلین د ښاغلي ټرمپ د پیغام په ځواب کې په ټویټر لیکلي دي چې "ترکیه د کردانو پر ضد نه بلکه د ترهگرو پر ضد جنگیږي...ترهگر نشي کولای چې ستاسې شریکان او متحد اوسي".
د ترکیې د بهرنیو چارو وزیر مولود چاوش اوغلو، هم د ښاغلي ټرمپ خبرداري باندې په انتقاد سره په یو خبري کنفرانس کې وویل چې ستراتیژیک متحدین له یو بل سره د ټولنیزو شبکو له لارې خبرې نه کوي.
ښاغلي چاوش اوغلو وویل "ترکیه له هیڅ گواښ نه ډاریږي. په اقتصادي گواښونو هیڅ هدف ته نشی رسیدلای... زمونږ امنیت ته د گواښ د له منځه وړلو لپاره هر هغه څه چې لازم وي هغه کوو".
د امریکا د بهرنیو چارو وزیر مایک پمپیو، د دوشنبې په ورځ (جنورۍ ١۴) د سعودي عربستان له مقاماتو سره له کتنې وروسته په یو خبري کنفرانس کې وویل چې تر اوسه د ښاغلي ټرمپ د گواښ په هکله یې د ترکي مقاماتو سره خبرې ندي کړي.
ښاغلي پمپیو ویلي چې د هغه په اند د جمهور رئیس ټرمپ هدف پر ترکیې باندې د بندیزونو لگول دي په هغه صورت کې چې پر سوري کردانو باندې د ترکي پوځیانو بریدونه دوام وکړي.
د سوریې کرد جنگیالي په عراق او سوریه کې د داعش پر ضد جگړه کې د امریکا د متحده ایالاتو نژدې متحدین دي. د امریکا د بهرنیو چارو وزیر د امریکایي پوځیانو سره د کردي جنگیالیو د همکارۍ ته په اشارې ویلي دي چې "هغوی په ټول دغه موده کې زمونږ تر څنگ جنگیدلي دي ددې وړتیا لري چې وساتل شي".
خو د ترکیې حکومت سوري کردان ترهگر گڼي او ویلي یې دي چې د سوریې په شمال کې به د هغوی پر ضد پراخ پوځي عملیات وکړي.