امنیتي چارواکي وايي، په کابل ښار کې ماین چاودنې دوه کسان وژلي او دوه تنه نور یې ټپیان کړي دي.
د کابل د امنیه قوماندانۍ ویاند فردوس فرامرز نن یکشنبه ډسمبر ۱۳ (لېندۍ ۲۳) ویلي چې د چسپکي ماین دغه چاودنه نن سهار د کابل ښار د پنځلسمې امنیتي حوزې په «هوتل پروان» سیمه کې پر یو لنډکروزر موټر شوې ده.
ښاغلي فرامرز ویلي چې د پېښې ټپیان روغتون ته انتقال شوي، خو دا یې نه دي ویلي چې وژل شوي او ټپي کسان ملکي وګړي او که امنیتي منسوبین دي.
که څه هم پولیسو د یادو کسانو د هویت په اړه معلومات نه دي ورکړي، خو ویل کیږي چې یاده چاودنه د ولسي جرګې د یو غړي پر موټر شوې ده.
په کابل کې د یو څارنوال وژنه
د یو بل خبر له مخې نن سهار د کابل ښار په اتمه امنیتي حوزه کې یو څارنوال په وسله وال برید کې وژل شوی دی.
د کابل د امنیه قوماندانۍ ویاند فردوس فرامرز وايي چې د حبیب الله په نوم څارنوال په کارته نو سیمه کې ترور شوی دی.
تر اوسه د دغه دواړو پېښو مسؤلیت کومې وسله والې ډلې نه دی منلی.
دا په داسې حال کې ده چې پرون شنبه هم پر کابل ښار لس راکټونه وتوغول شول. د افغانستان د کورنیو چارو وزارت د معلوماتو په اساس په پرونیو راکټي بریدونو کې یو تن وژل شوی او دوه نور ټپیان شوي دي.
تر دا مهاله د پروینو راکټي بریدونو مسؤلیت کومې وسله والې ډلې نه دی منلی.