افغانستان لپاره د ملګروملتونو مرستندویه پلاوي دفتر(یوناما) د طالبانو د حکومت له خوا په خپل سر د خبریالانو او د رسنیو د کارکوونکو پر نیولو اندیښنه څرګنده کړې او د طالبانو څخه یې غوښتي، چې د رسنیو ډارول دې بند کړي.
یوناما د پنجشنبې د ورځې ناوخته د اپریل اوم ( حمل ۱۷) افغانستان کې د طالبانو د حکومت له خوا د خبریالانو او رسنیو د کارکوونکو د نیولو لړۍ دوام ته په کتنې ویلي، چې د طالبانو له خوا په خپل سر د خبریالانو نیولو په کچه کې د کموالي هیڅ نښه نه لیدل کیږي.
د ملګروملتونو دغې ادارې ویلي، چې د خبریالانو او د رسنیو د کارکوونکو د نیولو په اکثرو قضیو کې طالبانو نیول شوي کسانوته په بند کې د ساتلو له ځایه بهر سره د هیڅ ډول اړیکو د نیولو اجازه هم نه ده ورکړې.
دوه اونۍ وړاندې کندهار په ولایت کې سمه ییزو طالب چارواکو څو خبریالان ونیول چې په بند کې د لنډې مودې پاتې کیدو وروسته یې خوشې کړل.
تراوسه د دغو خبریالانو د نیولو د علت په اړه طالب چارواکو څه نه دي ویلي، خو سیمه ییزو خبریالانو ویلي، چې لږ ترلږه یو خبریال په سیمه ییزه رسنۍ کې سندرو د خپرولو له امله نیول شوی وو.
یوناما ویلي " همدا اوس بسم الله وطندوست په بند کې د لس ورځو تیرولو او بهر سره د اړیکو لرلو پرته راخوشې شو. خو اوس نور بندیان شوي دي. ملګري ملتونه له طالبانو غواړي چې د رسنیو ډارول دې بند کړي".
Arbitrary & incommunicado detentions of journalists & media workers by the Taliban show no sign of abating. The reporter Bismillah Watandost just released after 10 days in incommunicado detention. But now more detentions. UN urges Taliban to halt their intimidation of media. https://t.co/6wOthxbDfH
— UNAMA News (@UNAMAnews) April 7, 2022
د خبریالانو د نیولو په تازه یو اقدام کې د افغان خبریالانو د خوندیتوب کمیټې ویلي، چې د طالبانو ولایتي چارواکو په غور ولایت کې د دغې کميتې ولایتي مسول غلام رباني هدفمند د یو بل سمه ییز خبریال ګل احمد خسرو سره یو ځای دوه ورځې وړاندې نیولي دي.
د خبریالانو د خوندیتوب کمیټې په یوه اعلامیه کې ویلي چې ګل احمد خسرو د څو ساعتونو بند وروسته بیرته خوشې شوی خو تراوسه لا د غلام رباني هدفمند برخلیک څرګند نه دی.
د خبریالانو د خوندیتوب کمیټې د طالبانو له حکومت غوښتي، چې ژر دې د دې کمیټې د غور ولایتي مسول خوشې کړي.
د غور ولایتي چارواکو د دغو دوو خبریالانو او د رسنیو د کارکوونکو د نیولو په اړه تراوسه څه نه دي ویلي. طالبانو حکومت هم د ملګروملتونو مرستندویه پلاوي دفتر ( یوناما) څرګندونو ته غبرګون نه دی ښودلی.
خو دمخه د طالبانو د حکومت ویاند ذبیح الله مجاهد ویلي وو، چې حکومت یې د اسلامي اصولو په چوکاټ کې د بیان ازادۍ او د خصوصي رسنیو څخه ملاتړ کوي.
د ازادو خبریالانو ټولنې په یوراپور کې چې څو ورځې وړاندې خپور شوی افغانستان کې د خبریالانو پر وړاندې د تاوتریخوالي د زیاتیدو خبر ورکړی او ویلي دي، چې په تیرو اوو میاشتو کې دغې ادارې د خبریالانو پر وړاندې د تاوتریخوالي ۱۱۴ پیښې ثبت کړي دي.