په افغانستان کې د ملګرو ملتونو دفتر [یوناما] په واکمنو طالبانو غږ کړی دی چې د ښځو د سنګارتونونو د تړل کېدو په اړه فرمان لغوه کړي.
د طالبانو امر بالمعروف وزارت تېره ورځ وویل چې د دغې ډلې د امیر المومنین د لارښوونې په اساس په افغانستان کې د ښځو د سنګار صالونونه بندوي.
یوناما نن چهارشنبه جولاۍ څلورمه (سرطان۱۴) په یوې اعلامیې کې وویل: «موږ په واکمنو مقاماتو غږ کوو چې د سنګارتونونو د تړلو په اړه فرمان بند کړي. د ښځو په حقونو باندې دا نوی بندیز په اقتصاد باندې منفي اغیز کوي او د ښځینه متشبثینو سره د اعلان شوي ملاتړ خلاف دی.»
UNAMA calls on the de facto authorities to halt the edict closing beauty salons. This new restriction on women’s rights will impact negatively on the economy&contradicts stated support for women entrepreneurship. UNAMA remains engaged w/stakeholders seeking reversal of the bans.
— UNAMA News (@UNAMAnews) July 4, 2023
یوناما ویلي دي چې خپلو شریکانو سره، چې په ښځو باندې د بندیزونو لېرې کېدل غواړي، په دې مسئلې باندې په خبرو کې دخیله پاتې کېږي.
طالبانو واک ته له بیا رسېدو وروسته، په شاوخوا دوو کلونو کې تر شپږم ټولګي ورپورته د نجوتو په زده کړو د بندیز تر څنګ، د ښځو په کار او تجارت هم بندیز لګولی دی او نور محدودیتونه یې وضع کړي.
طالبان وايي پرېکړې یې د «شریعت او افغان فرهنګ» په اساس دي، خو یو شمېر اسلامي هېوادونو او نړیوالې ټولنې ترې غوښتي چې په ښځو باندې لګول شوي بندیزونه لېرې کړي.
د طالبانو د حکومت د «امربالمعروف او نهی عن المنکر» وزارت ویاند محمد صادق عاکف مهاجر رویټرز خبري اژانس ته ویلي دي چې په سنګارتونو باندې نوی بندیز یې د مشر هبت الله د شفاهي امر په اساس لګول شوی دی.
ټاکل شوې، چې ددې امر له مخې به د یوې میاشتې وروسته ښځې د کابل په ګډون په ۳۴ ولایتونو کې د سینګار خونو د فعالیت اجازه ونلري. همداشان د کابل ښاروالۍ څخه غوښتل شوي چې له دې وروسته ښځو ته د سینګار خونو د پرانیستلو جواز ور نکړي.
د سنګارتونونو ځینو مالکانو او د متشبثینو د طالبانو دا پرېکړه غندلې دي او دا یې د ښځو د کار او تجارت د ځپلو په مانا بللی دی.